ხვალ, 19 ივლისს, 12:00 საათზე; საქართველოს ახალგაზრდა იურისტთა ასოციაციის ოფისში ახალ საგადასახადო კოდექსთან დაკავშირებით არასამთავრობოები სპეციალურ ბრიფინგს გამართავენ. არასამთავრობოები ბირიფინგს მიუძღვნიან გრანტების საშემოსავლო გადასახადით დაბეგვრის ახალ რეჟიმს, რომელსაც საქართველოს პარლამენტი მე-2 მოსმენით იხილავს. კერძოდ, ახალი საგადასახადო კოდექსის პროექტის მიხედვით დაგეგმილია გრანტის ფარგლებში გაცემული ანაზღაურების საშემოსავლო გადასახადის განაკვეთის ზრდა 2011 წლის 1 იანვრიდან 12%-დან 20%-მდე. მოქმედი საგადასახადო კოდექსის თანახმად საშემოსავლო გადასახადის ზრდა 2011 წლის 1 იავნრიდან 18%-მდე იგეგმებოდა.
არასამთავროები მიიჩნევენ, რომ ახალი საგადასახადო კოდექსის პროექტის არსებული სახით მიღება მხოლოდ ხელს შეუშლის არასამთავრობო ორგანიზაციათა ეფექტურ და წარმატებულ საქმიანობას. აღნიშნული ცვლილებები ნეგატიურად აისახება იმ მნიშვნელოვან როლზე, რომელსაც სამოქალაქო საზოგადოება ემსახურება, კერძოდ ქვეყნის დემოკრატიული განვითარების პროცესის ხელშეწყობასა და მოწყვლადი ჯგუფების დახმარებაზე, იმ სერვისების მიწოდებაზე, რომელსაც ხშირ შემთხვევაში, სახელმწიფო სხვადასხვა ფაქტორის გამო თავად ვერ სთავაზობს მოსახლეობას.
არასამთავრობო ორგანიზაციები მოუწოდებენ საქართველოს პარლამენტსა და მთავრობას გადაიხედოს ახალი საგადასახადო კოდექსის პროექტის შესაბამისი მუხლები და გრანტის სახით მიღებული შემოსავლის საშემოსავლო გადასახადის განაკვეთი 2014 წლის 1 იანვრამდე განისაზღვროს 12%-ით. აღნიშნულ განცხადებას უერთდება 40-მდე არასამთავრობო ორგანიზაცია და 120-ზე მეტი ფიზიკური პირი.
ერთობლი ბრიფინგს მართავენ - საქართველოს ახალგაზრდა იურისტთა ასოციაცია, ევრაზიის თანამშრომლობის ფონდი, კავკასიის გარემოსდაცვით არასამთავორობო ორგანიზაციათა ქსელი (CENN), საერთაშორისო გამჭვირვალეობა - საქართველო, სამართლიანი არჩევნებისა და დემოკრატიის საერთაშორისო საზოგადოება (ISFED), კონსტიტუციის 42-ე მუხლი, ადამიანის უფლებათა ცენტრი, სამოქალაქო საზოგადოების ინსტიტუტი და ასოციაცია „სამართალი და თავისუფლება".
