ბაქოში საქართველოსა და აზერბაიჯანის საგარეო საქმეთა მინისტრების მოადგილეების დავით ჯალაღანიასა და ხალაფ ხალაფოვის კონსულტაციები გაიმართა. ორივე მათგანი აზერბაიჯანსა და საქართველოს შორის სახელმწიფო საზღვრის დელიმიტაციის სახელმწიფო კომისიის ხელმძღვანელები არიან. ინფორმაციას ამის შესახებ აზერბაიჯანის საგარეო საქმეთა სამინისტრო ავრცელებს.
"კონსულტაციების ფარგლებში საქართველოსა და აზერბაიჯანს შორის არსებული სახელმწიფო საზღვრის შეუთანხმებელი მონაკვეთები განიხილეს. ისაუბრეს ასევე ამ საკითხთან დაკავშირებით, როგორც ერთი ისე მეორე მხრიდან ექსპერტებს შორის გამართულ შეხვედრაზე", _ იუწყება აზერბაიჯანის საგარეო უწყება და დასძენს, რომ შეხვედრაზევე საზღვრის გამავალი ხაზის შესახებ შეთანხმების საკითხში წინ წაწევა დაფიქსირდა.
ასევე შედგა შეთანხმება, მიმდინარე წლის სექტემბერში აღნიშნული სახელმწიფო კომისიის მორიგი სხდომის ჩატარების შესახებ.
აზერბაიჯანის საგარეო საქმეთა სამინისტრო აღნიშნული ინფორმაციის გავრცელებისას აღნიშნავს, რომ _ საქართველო აზერბაიჯანის შვიდ რაიონს ესაზღვრება - კაზახსკი, აგსტაფინსკი, ტოვუზსკი, სამუხსკი, კახსკი (კახი), ბაქალანსკი (ბელაქანი), ზაგატალსკი (ზაქათალა). ხაზის სიგრძე 480 კილომეტრია. აქამდე მხარეებმა სახელმწიფო საზღვრის მხოლოდ 65 % -ის შეთანხმება შეძლეს.
აზერბაიჯანის საგარეო უწყება ასევე აღნიშნავს, რომ საქართველოსა და აზერბაიჯანის სახელმწიფო საზღვრის დელიმიტაცია-დემარკაციის საკითხის გადაუწყვეტელობა ამდენი ხანი, სამხრეთ კავკასიის ერთ-ერთ უმნიშვნელოვანეს კულტურულ და რელიგიურ ღირშესანიშნაობის - დავით გარეჯის სამონასტრო კომპლექსთანაა დაკავშირებული. სამონასტრო კომპლექსი თბილისიდან სამხრეთ-აღმოსავლეთით - 60 კილომეტრში მდებარეობს. მთავარ მონასტრად ითვლება ლავრა წმინდა დავითისა, რომელიც მთის ჩრდილოეთ ფერდობზე მდებარეობს, სწორედ ეს მთა ჰყოფს საქართველოსა და აზერბაიჯანს.
