საქართველოს პრეზიდენტმა მიხეილ სააკაშვილმა დღევანდელ მთავრობის სხდომაზე "ნაციონალური მოძრაობის" ყველა წევრს მადლობა გადაუხადა იმისათვის, რომ წინასაარჩევნო კამპანია კარგად ჩატარდა და მათი ყველა გზავნილი მოსახლეობასთან ადვილად მივიდა. მისი თქმით, ყველამ უნდა დაინახოს, რომ დღევანდელი ხეილსუფლება მხოლოდ საარჩევნო მთავრობა არ არის.
"ძალიან მნიშვნელოვანია, რომ ჩვენ ყველამ, ამ რთულ, გარდამავალ პერიოდში ვაჩვენოთ კოორდინირებული ჯგუფური მუშაობა. ამავე დროს, მინდა ვთქვა, რომ მთავარი ჩვენი გზავნილი საზოგადოებისადმი და საკუთარი თავისადმი პირველ რიგში უნდა იყოს ის, რომ ჩვენ არ ვართ საარჩევნო მთავრობა და არ ვართ წინასაარჩევნო კამპანიის მთავრობა, თუმცა მინდა ვთქვა, რომ ყველას მადლობას ვუხდი, ვინც მობილიზებული იყო და კარგად განუმარტა საზოგადოებას ჩვენი პოლიტიკა, სხვადასხვა სფეროში. ჩვენ ვართ მთავრობა, რომელიც არის არა არჩევნების, არამედ აღმშენებლობის", - აღნიშნა სააკაშვილმა
პრეზიდენტი 30 მაისის ადგილობრივი თვითმართველობის არჩევნების მიმდინარეობის პროცესს მაღალ შეფასება აძლევს და ამის არგუმენტად ანდრეს ფოგ რასმუსენის გუშინდელი გამოსვლა მოჰყავს:
"არჩევნებმა ჩაიარა ყველა დონეზე მაღალი შეფასებით. ნახეთ თქვენ შეფასებებიც. გუშინ, ნატოს გენერალურმა მდივანმა უწოდა ამ არჩევნებს პატიოსანი და თავისუფალი არჩევნები ეს არის ის შეფასება, რომელიც ყველა განვითარებულ და დემოკრატიულ არჩევნებს ეძლევა. ეს იყო საერთაშორისო ორგანიზაციების შეფასება, რომელიც იყო ერთმნიშვნელოვნად დადებითი. ეს ნიშნავს იმას, რომ ჩვენ ეხლა ინვესტორების ბევრად მეტი ნდობის მოპოვება შეგვიძლია, ჩვენ შეგვიძლია ბევრად მეტი ოპტიმიზმით შევხედოთ მომავალს. უახლესი არჩვენები მინიმუმ ორი წელი აღარ იქნება. ეს ნიშნავს იმას რომ ჩვენ გვაქვს მრავალი თვე და მინიმუმ ეს წელიწადი მნიშვნლეოვანი რეფორმებისთვის", - განაცხადა პრეზიდენტმა.
