ხვალ, 9 აპრილს, ქუთაისში, ჭავჭავაძის გამზირზე, საქალაქთაშორისო ავტობუსებისა და მიკროავტობუსების მძღოლების საპროტესტო აქცია გაიმართება.
როგორც პროფესიული კავშირების გაერთიანებაში აცხადებენ, აქცია საავტომობილო ტრანსპორტისა და გზების მუშაკთა პროფესიული კავშირის ორგანიზებით იმართება და მასში 60-მდე მძღოლი მიიღებს მონაწილეობას.
აქციის მონაწილეები ცენტრალური სადგურის სიახლოვეს ახალი ავტოსადგურის მშენებლობას აპროტესტებენ.
საავტომობილო ტრანსპორტისა და გზების მუშაკთა პროფესიული კავშირის თავმჯდომარის, ლავრენტი ალანიას განცხადებით, მშენებლობა უკანონოა, რადგან მასზე თვითმმართველობის შესაბამისი ნებართვა არაა გაცემული. მისი განცხადებით, ახალი ავტოსადგური უკვე მოქმედი სადგურის მძღოლებს არაჯანსაღ კონკურენციას გაუწევს.
