აჭარის სურსათის უვნებლობის სამსახური რამოდენიმე დღეში ხორცპროდუქტების შემოწმებას დაიწყებს. როგორც სააგენტო "ჯი-ეიჩ-ენთან" საუბრისას აჭარის სურსათის უვნებლობის სამსახურის მოადგილემ რამაზ სურმანიძემ განაცხადა, ხორცპროდუქტების შემოწმება ზაფხულის დადგომას და სიცხეებს უკავშირდება.
ანალოგიური შემოწმება აჭარის სურსათის უვნებლობის სამსახურმა გასულ წელსაც განხორციელა და სურსათის უვნებლობის სამსახურმა აჭარის სარეალიზაციო ქსელში გატანილი "მითანას", "დიმკასა" და "ზეიკიძის" ძეხვეულში გარკვეული დარღვევეი აღმოაჩინა და პროდუქციის სარეალიზაციო ქსელიდან ამოღების გადაწყვეტილება მიიღო.
შეგახსენებთ, რომ აჭარის სოფლის მეურნეობის სამინისტროს ინფორმაციით, გასულ წელს რეგიონში სურსათის უვნებლობის სამსახურის მიერ სურსათის სარეალიზაციო ობიექტებში ჩატარებულმა მონიტორინგის შედეგებმა უჩვენა, რომ სამომხმარებლო ბაზრებზე უხარისხო და ადამიანის ჯანმრთელობისთვის საშიში საკვები პროდუქტების ხვედრითი წილი საკმაოდ მაღალია.
აჭარაში 2009 წელს სასურსათო პროდუქციის 222 ნიმუში შემოწმდა. ლაბორატორიული კვლევებით დადგინდა, რომ სავაჭრო ობიექტში, კომპანია ,,მითანას' მოხარშული ძეხვი "მსუყე'', კომპანია "ზეიკიძის' მოხარშული სოსისი "სამოყვარულო'' და ნახევრად შებოლილი ძეხვი "ზეიკიძე'', კომპანია ,,დიმკას' წარმოებული მოხარშული სოსისი "ივერია'' და "მოლოჩნი'', ირანული წარმოების საღეჭი რეზინი "პარასტო'' ორგანოლეპტიკური, ქიმიური და მიკრობიოლოგიური მაჩვენებლებით არ შეესაბამებოდა ჰიგიენურ მოთხოვნებს, რის გამოც ამ პროდუქციის რეალიზაციის შეჩერებისა და განადგურების გადაწყვეტილება იქნა მიღებული. მწარმოებელ ორგანიზაციის ხელმძღვანელებს კი მკაცრი გაფრთხილებები და ის ინსტრუქციები გადაეგზავნათ, რითაც საწარმოში სანიტარული და ჰიგიენური ნორმების დაცვა უმოკლედ ვადებში უნდა უზრუნველყონ.
