უკრაინაში მიმდინარე მოვლენებთან დაკავშირებით თბილისის საკრებულოს უმცირესობა განცხადებას ავრცელებენ, რომელსაც ,,ჯი-ეიჩ-ენი" უცვლელად გთავაზობთ: "ძნელი წარმოსადგენია, ვინმემ არ იცოდეს, თუ რა ხდება დღეს უკრაინის დედაქალაქში. თითქმის სამი კვირაა, ჩვენი მოძმე ქვეყნის მოქალაქენი მშვიდობიანი გზით იცავენ საკუთარ, ევროპულ არჩევანს, საკუთარი შვილებისა და შვილიშვილების მომავალს, რომელიც მათ ძალით წაართვეს.
ძნელად მოიძებნება ქვეყანა, რომელსაც ასე ჰქონდეს გაცნობიერებული თავისუფლების ფასი და ამდენი მსხვერპლი გაეღოს ამ მიზნის მისაღწევად, როგორც საქართველოს, ამიტომაც ჩვენ გულგრილნი ვერ დავრჩებით ამ მოვლენების მიმართ.
ჩვენი მოძმე უკრაინელი ერი, თავისუფლებისკენ მიმავალ რთულ გზაზე ყოველთვის გვერდით ედგა ჩვენს სახელმწიფოს. თავს ნუ მოვიტყუებთ, დღეს ხალხით სავსე მოედანზე ნაწილობრივ ჩვენი ბედიც წყდება, ბედი, რომელიც, უკრაინელების მსგავსად, ჩვენმა მოსახლეობამაც მტკიცედ დაუკავშირა ევროპულ ოჯახს.
მოვუწოდებთ, დაპირისპირებულ მხარეებს, მშვიდობიანად, მხოლოდ დიალოგით გადაწყვიტონ, ერთის შეხედვით, თითქოს და, გადაუჭრელი პრობლემა და ნუ მიიყვანენ საქმეს სამოქალაქო დაპირისპირებამდე. გახსოვდეთ, ჩვენ თქვენს გვერდით ვართ", - ნათქვამია განცხადებაში, რომელსაც თბილისის საკრებულოს ,,ნაციონალური მოძრაობის'' ყველა ფრაქციის წარმომადგენელი აწერს ხელს:ქ.თბილისის საკრებულოს ფრაქცია "ერთიანი ნაციონალური მოძრაობა- განახლებული თბილისი''ქ.თბილისი საკრებულოს ფრაქცია "ერთიანი ნაციონალური მოძრაობა-ძველი თბილისი''ქ.თბილისი საკრებულოს ფრაქცია "ერთიანი ნაციონალური მოძრაობა-ახალი თბილისი''ქ.თბილისი საკრებულოს ფრაქცია "ერთიანი ნაციონალური მოძრაობა-რეფორმატორები''ქ.თბილისი საკრებულოს ფრაქცია "ერთიანი ნაციონალური მოძრაობა-ჩვენი ქალაქი''ქ.თბილისი საკრებულოს ფრაქცია "ერთიანი ნაციონალური მოძრაობა-ნაცნობი თბილისი''ქ.თბილისი საკრებულოს ფრაქცია "ერთიანი ნაციონალური მოძრაობა-ტიფლისი"
