დოლართან მიმართებაში ლარის კურსის დაცემას სებ-ის პრეზიდენტის მსგავსად, სეზონურ ფაქტორებს უკავშირებს ქვეყნის ფინანსთა მინისტრიც. ნოდარ ხადურის განმარტებით, კურსის ცვლილებას სეზონური ფაქტორი გააჩნია.
„ეს არის ჩვეულებრივი მოვლენა. სებ-ს აქვს შესაბამისი რეზერევები იმისათვის, რომ არ დაუშვას მნიშვნელოვანი გაუფასურება. რაც შეეხება მარტივ რყევებს, ეს მუდმივი პროცესია ხან მაღლა იწევს, ხანაც დაბლა"- განაცხადა ხადურმა
შეგახსენებთ, რომ ლარის კურსის ცვლილებაზე გუშინ კომენტარი გააკეთა სებ-ის პრეზიდენტმაც. გიორგი ქადაგიძის განმარტებით, ლარს ყოველთვის ახასიათებდა მცირედი რყევები, თუმცა გიორგი ქადაგიძის განმარტებით, გრძელვადიან პერსპექტივაში რაიმე საგანგაშო მოსალოდნელი არ არის.
„ლარის კურსთან დაკავშირებით მინდა აღვნიშნო, რომ არაფერი განსაკუთრებული არ ხდება. ეს არის ჩვეულებრივი მოკლევადიანი რყევები, რომელიც ყოველთვის ახასიათებდა ლარის კურსს. ყოველთვის იქნება ლარის მერყეობა ორივე მიმართულებით, როგორც გამყარების ასევე გაუფასურების მიმართულებით. ამ ეტაპზე ეს დაკავშირებულია მოკლე სეზონურ ფაქტორებთან. რაც შეეხება გრძელვადიან და მოკლევადიან ფინანსურ სტაბილურობას, მოგეხსენებათ, რომ ფინანსური სტაბილურობის გარანტორი არის სებ-ი. ჩვენ გაგვაჩნია, ფინანსურიც, ინფრასტრუქტურული და ადამიანური რესურსიც ამისათვის. ეს არაერთხელ დაგვიმტკიცებია ჩვენ წარსულში და სწორედ ამიტომ არის საბანკო სექტორისადმი ნდობა მაღალი"- განაცხადა გიორგი ქადაგიძემ
