საქართველო-ევროკავშირს შორის ასოცირების შეთანხმების პარაფირებიდან ხელშეკრულების ხელმოწერამდე უზარმაზარი სამუშაოებია ჩასატარებელი და ამისათვის ეროვნული ბანკი მზად არის, აღნიშნულის შესახებ განცხადება სებ-ის პრეზიდენტმა გიორგი ქადაგიძემ გააკეთა. მისივე განმარტებით, ამ ხნის განმავლობაში სამუშაოები იქნება გასაწევი საკანონმდებლო, ფასიანი ქაღალდების, დაზღვევისა და საბანკო ზედამხედველობის მიმართულებით.
„მე ვფიქრობ, რომ დღეს არის ძალიან მნიშვნელოვანი დღე საქართველოს ეკონომიკური განვითარების და ზოგადად ქვეყნის ისტორიაში. ფაქტობრივად ჩვენი განვითარების ახალ ფურცელზე გადავდივართ. ხაზგასასმელია, რომ პარაფირებიდან ხელმოწერამდე უზარმაზარი სამუშაოებია ჩასატარებელი. კერძოდ, საკანონმდებლო, ფასიანი ქაღალდების, დაზღვევისა და საბანკო ზედამხედველობის მიმართულებით. ეროვნული ბანკი ამისათვის მზად არის. იმედს გამოვთქვამ, რომ ის მძიმე შრომა, რომელიც საქართველოს პარლამენტს და მთავრობას ექნება, მაღალი კოორდინაციით რაც შეიძლება სწრაფად უნდა გავწიოთ, რომ შედეგი მივიღოთ"- განაცხადა ქადაგიძემ.