2014 წლის 4 აპრილს ცნობილი ამერიკული საფირმო ყავისა და ჩაის ქსელის, „The Coffee Bean & Tea Leaf"-ის პირველი რესტორანი Tbilisi Mall-ში გაიხსნება. „The Coffee Bean & Tea Leaf" ასევე ცნობილი ბრენდის, „Starbucks"-ის მთავარ კონკურენტად ითვლება.
საქართველოს ეროვნული საინვესტიციო სააგენტოს ინფორმაციით შემდეგი 5 წლის მანძილზე კომპანია დამატებით 10-15 ფილიალის გახსნას გეგმავს. საქართველოში სწრაფი კვების ობიექტების გარდა კომპანია ასევე ჩამოაყალიბებს რეგიონალურ ცენტრს, საიდანაც მოხდება მთლიანი კავკასიის რეგიონის მართვა და მომარაგება. ამასთან, კომპანია გაფართოვების სტრატეგიის ფარგლებში გეგმავს საქართველოში ტრენინგ ცენტრის ჩამოყალიბებას და ქართველი სპეციალისტების დაქირავებას, რომლებიც ცენტრალურ აზიაში, გაერთიანებულ არაბეთის ემირატებსა და განსაკუთრებით დუბაიში გაფართოვების პროექტების მართვაში მიიღებენ მონაწილეობას. აღნიშნული ბრენდის პარტნიორი საქართველოში იურიდიული ფირმა BLC იქნება.
„The Coffee Bean & Tea Leaf" - ის პირველი რესტორანი 1963 წელს, კალიფორნიაში გაიხსნა. „The Coffee Bean & Tea Leaf" ყავისა და ჩაის რესტორნების ყველაზე ძველი და დიდი კერძო მფლობელობაში არსებული ამერიკული კომპანიაა და დღეისათვის 28 ქვეყანაში 1000-მდე რესტორანს აერთიანებს. ბრენდი საკმაოდ პოპულარულია ჰოლოვუდში, სადაც მისი საფირმო სასმელები ცნობილი ვარსკვლავების განსაკუთრებული სიყვარულით სარგებლობენ.