ამერიკის ყოფილი ელჩი საქართველოში ,,ამერიკის ხმის" ჟურნალისტისთვის მიცემულ ინტერვიუში ყოფილი პრეზიდენტის მიხეილ სააკაშვილის პოზიტიურ და ნეგატიურ მხარეებს აფასებს და აღნიშნავს, რომ საქართველოს ექს-პრეზიდენტის ერთ-ერთი შეცდომა მისი მოუთმენლობა იყო.
საქართველოში ყოფილი ელჩის განმარტებით, მიხეილ სააკაშვილმა თავის მმართველობის პერიოდში მნიშვნელოვნად შესუსტა კორუფცია.
ჟურნალისტს შეკითხვაზე ,,თქვენი აზრით, რა იყო სააკაშვილის მთავრობის ყველაზე დიდი შეცდომები ვარდების რევოლუციიდან 2012 წლის საპარლამენტო არჩევნებამდე?", რიჩარდ მაილსი პასუხობს: ,,პირველ რიგში, „არა- შეცდომებზე" ვისაუბროთ: მან საპატრულო პოლიციაში კორუფცია აღმოფხვრა, დანარჩენ პოლიციაში ის შეასუსტა. ასევე შეასუსტა კორუფცია ბიზნეს და ეკონომიკურ სფეროებში. გაზარდა შემოსავლები და ამ შემოსავლის ხარჯვა დაიწყო ხელფასებზე, პენსიებზე ინფრასტრუქტურის მშენებლობაზე, რომელიც მანამდე ძალიან ცუდი იყო. კორუფციასთან ბრძოლის დროს, გამოიკვეთა ტენდენცია, რომ ის ყურადღებას შევარდნაძესთან დაახლოებულ ადამიანებზე ან მის ნათესავებზე ამახვილებდა. ამ მონეტის მეორე მხარეს, გარკვეულწილად, დღეს ვხედავთ. ეს პოლიტიკაში ნორმალური მოვლენაა, სხვადასხვა ფორმით ეს ყველგან ხდება. ეს შეიძლება მის ერთ შეცდომად ჩაითვალოს. ამან ამერიკელებს აფიქრებინა, რომ ის ბრწყინავი ჯავშნით შემოსილი რაინდი არ იყო. ჩვენ ამის შესახებ ვაშინგტონს ინფორმაციას ვაწვდიდით. ის ამაყობდა კიდეც იმით, თუ როგორ ართმევდა ამას თავს. ხალხს აჩვენებდა, რომ სჯიდა ადამიანებს, რომლებიც სახელმწიფო თანხებს ითვისებდნენ. მაგრამ ეს სახელმწიფო თანხები არ იყო. ეს იყო ადამიანების ფული, რომლებსაც გზაზე აჩერებდნენ და ფულს სთხოვდნენ. ხალხი ამ ეპოქას სტალინის ხანას 1930-40ან წლებს ადარებდა. ის ასევე გაუსწორდა შევარდნაძის სიძის ბიზნესს, რომელიც მეტ წილად ამერიკული ინვესტიცია იყო. ამან კარგი შთაბეჭდილება არ დატოვა. ამ თემაზე არაერთხელ ვესაუბრე თავად სააკაშვილს და ჟვანიას. ამ ყველაფერმა დამაფიქრა იმაზე, თუ როგორ ესმოდა მას დემოკრატიული პროცესები და რამდენად იყო თავდადებული დემოკრატიული პროცესების მიმართ. მოგვიანებით, ვაშინგტონმაც დაიწყო ამაზე ფიქრი. კიდევ ერთი დიდი შეცდომა სააკაშვილის მოუთმენლობა იყო. ორ საკითხს აღვნიშნავ. ერთი იყო ის, რომ სურდა ქვეყანაზე რაღაც სახით საკუთარი ნიშანი დაედო. ამაში შედიოდა ის გრანდიოზული სამშენებლო პროცესები ან გასართობი პარკები და სხვა ასეთი პროექტები, რომლებსაც ეკონომიკური დანიშნულება არ ჰქონდა, მაგრამ ქვეყანას დიდძალი ფული უჯდებოდა.
მაგრამ ამაზე მნიშვნელოვანია მისი მოუთმენლობა სეპარატისტული რეგიონების - აფხაზეთისა და სამხრეთ ოსეთის საკითხის გადაჭრასთან დაკავშირებით", _აცხადებს რიჩარდ მაილსი.
