ბულგარეთის რესპუბლიკაში ოფიციალური ვიზიტის ფარგლებში საქართველოს სააგრეო საქმეთა მინისტრი მაია ფანჯიკიძე ბულგარეთის რესპუბლიკის პრეზიდენტმა როსენ პლევნელიევმა მიიღო.
შეხვედრაზე მხარეებმა ისაუბრეს ვილნიუსის აღმოსავლეთ პარტნიორობის მოახლოებულ სამიტზე, საქართველოს ევროპული და ევროატლანტიკური ინტეგრაციის პერსპექტივაზე და ორმხრივი ურთიერთობების გაღრმავების საკითხებზე.
ბულგარეთის რესპუბლიკის პრეზიდენტის მხრიდან კიდევ ერთხელ დადასტურდა მხარდაჭერა საქართველოს ევროპული და ევროატლანტიკური ინტეგრაციის გზაზე. როგორც შეხვედრისას პრეზიდენტმა პლევნელიევმა აღნიშნა, ბულგარეთისთვის მნიშვნელოვანია აღმოსავლეთ პარტნიორობის ინიციატივა და ამ გზაზე მიღწეული პროგრესი. ბულგარეთი ასევე მხარს უჭერს ნატოს ღია კარის პოლიტიკას და მიესალმება ამ მიმართულებით გადადგმულ ნაბიჯებს.
შეხვედრაზე საუბარი შეეხო საქართველოსა და ბულგარეთს შორის არსებულ ორმხრივ ურთიერთობებს და ცალკეული მიმართულებით თანამშრომლობის განვითარების პერსპექტივებს. ბულგარეთის მხრიდან გამოითქვა წინადადება ეკონომიკის, ენერგეტიკის, ტრანსპორტის, კულტურისა და სხვა მიმართულებით ერთობლივი სამთავრობო ინიციატივების შემუშავების შესახებ.
ბულგარეთის პრეზიდენტმა საქართველოს საგარეო საქმეთა მინისტრს საპრეზიდენტო არჩევნების დემოკრატიულად, საერთაშორისო სტანდარტებით ჩატარება მიულოცა.
შეხვედრაზე ასევე განიხილეს რუსეთ-საქართველოს ურთიერთობები. ბულგარეთის პრეზიდენტმა კიდევ ერთხელ დააფიქსირა მისი ქვეყნის მიერ საქართველოს ტერიტორიული მთლიანობისა და სუვერენიტეტის მხარდაჭერა საერთაშორისოდ აღიარებულ საზღვრებში.
შეხვედრის დასასრულს საქართველოს საგარეო საქმეთა მინისტრმა ბულგარეთის რესპუბლიკის პრეზიდენტს მხარდაჭერისთვის მადლობა გადაუხადა და იგი საქართველოში მოიწვია.
