საქართველოს პრემიერ-მინისტრის ირაკლი ღარიბაშვილის შეხვედრა საფრანგეთის საგარეო ვაჭრობის მინისტრ ნიკოლ ბრიკთან მთავრობის კანცელარიაში გაიმართა. პრემიერ-მინისტრმა სტუმარს საქართველოს მთავრობის ეკონომიკური პოლიტიკის ძირითადი მიმართულებები, მათ შორის ლიბერალური სავაჭრო პოლიტიკა გააცნო. როგორც შეხვედრაზე აღინიშნა, საქართველომ და ევროკავშირმა წარმატებით დაასრულეს მოლაპარაკებები ღრმა და ყოვლისმომცველი თავისუფალი ვაჭრობის შეთანხმებაზე (DCFTA), რასაც ხელი შეუწყო ორივე მხარის სურვილმა, უმოკლეს ვადებში მხარეთა ინტერესების გათვალისწინებით მიეღწიათ შეთანხმებისთვის. ირაკლი ღარიბაშვილის განცხადებით, საქართველო მიესალმება ევროკავშირის ძალისხმევას, მოახდინოს შეთანხმების პარაფირება 2013 წლის 28 ნოემბერს, აღმოსავლეთ პარტნიორობის ვილნიუსის სამიტის ფარგლებში. მანვე მადლობა გადაუხადა ნიკოლ ბრიკს ამ მიმართულებით საფრანგეთის მიერ გამოჩენილი აქტიური მხარდაჭერისთვის.
შეხვედრას საფრანგეთის დელეგაციის წარმომადგენლები და საქართველოს ეკონომიკის მინისტრი დაესწრნენ.