საქართველოს პრეზიდენტის გიორგი მარგველაშვილის განცხადებით, ხელისუფლების მიზანია შეიარაღებულმა ძალებმა მომზადების ისეთ დონეს მიაღწიონ, რომელიც ნებისმიერ მოწინააღმდეგეს ბრძოლის სურვილს დაუკარგავს. როგორც მარგველაშვილმა მეოთხე სამხედრო ბრიგადის წევრების დაჯილდოების ცერემონიალზე განაცხადა ჯარისკაცების ღვაწლი სამშობლოსა და გლობალური უსაფრთხოების მშვიდობის საქმეში ფასდაუდებელია.
"ჩვენ მოვალენი ვართ ქვეყნის თავდაცვისუნარიანობის ამაღლებაზე. უდიდესი მხედართმთავარი ამბობდა, ყველაზე უკეთესია დაამარცხო სხვისი არმია უბრძოლველად, ყველაზე უკეთესი ომი არის მოსპო მოწინააღმდეგის ჩანაფიქრები. ჩვენი მიზანია მივაღწიოთ შეიარაღებული ძალების მომზადების ისეთ დონეს, რომელიც ბრძოლის სურვილს დაუკარგავს ნებისმიერ მოწინააღმდეგეს. თუ სამშობლოს დასჭირდება, ყოველი ჩვენგანი მზად იქნება, თავი გასწიროს. მე ვიცი, რომ ასეთ დროს თქვენ კვლავ პირველ რიგებში იდგებით და თავდადების მაგალითებს მისცემთ სხვებს. სიამაყით და ტკივილით უნდა გავიხსენოთ სამშობლოსთვის დაღუპული თქვენი თანამებრძოლები, ოფიცრები და ჯარისკაცები. ქედს ვიხრი მათი ნათელი ხსოვნის წინაშე. წარმატებას გისურვებთ", - განაცხადა მარგველაშვილმა.
