აშშ-ის კონგრესის წარმომადგენელთა პალატის საგარეო საქმეთა კომიტეტმა განიხილა დემოკრატების ლიდერის, კონგრესმენ ელიოტ ენგელის (დ-ნიუ იორკი) მიერ 12 ნოემბერს ინიცირებული რეზოლუციის პროექტი (H.Res.402: Supporting the European aspirations of the peoples of the European Union's Eastern Partnership countries, and for other purposes).
დოკუმენტი მხარს უჭერს საქართველოს, უკრაინის, მოლდოვისა და აღმოსავლეთ პარტნიორობის სხვა ქვეყნების ევროპულ მისწრაფებს და აღნიშნავს, რომ დემოკრატიული, აყვავებული და სტაბილური აღმოსავლეთ ევროპა და კავკასიის რეგიონი აშშ-ს ეროვნულ ინტერესს წარმოადგენს და, ასევე მნიშვნელოვანია ნატოს და ევროკავშირისათვის.
პროექტში კენჭისყრის შედეგად შევიდა კონგრესმენ ენგელის მიერ შემოთავაზებული ცვლილებები და დოკუმენტის უკვე შესწორებული ვერსია კომიტეტის ერთხმად მიღებული გადაწყვეტილებით შემდგომი განხილვისთვის გადაეგზავნა წარმომადგენელტა პალატას.
საქართველოს ევროპულ მომავალთან დაკავშირებით აშშ-ის კონგრესის საგარეო ურთიერთობათა კომიტეტის გავლენიანმა დემოკრატმა წევრმა ელიოტ ენგელმა განცხადებაც გაავრცელა.
„20 ნოემბერს, წარმომადგენლობითი პალატის საგარეო ურთიერთობათა კომიტეტმა ერთხმად მიიღო რეზოლუცია H. Res. 402. ეს ორპარტიული რეზოლუცია , რომელიც მე წარვადგინე, მხარს უჭერს საქართველოსა და რეგიონის სხვა ქვეყნების ევროპულ მისწრაფებებს, რომლებიც მზად არიან გააღრმავონ ურთიერთობები ევროპასთან, ევროკავშირის აღმოსავლეთ პარტნიორობის ინიციატივის ფარგლებში. ნოემბრის ბოლოს, საქართველო მზადაა ევროკავშირთან ისტორიულ შეთანხმების პარაფირებისთვის, რომელიც დაეხმარება მას დემოკრატიული ინსტიტუტების გაძლიერებაში, ეკონომიკურ ზრდასა და კანონის უზენაესობის განმტკიცებაში. ეს შეთანხმება შესაძლებელი გახდა იმ პროგრესის გამო, რომელიც საქართველომ დემოკრატიული ნორმებისა და სტანდარტების დანერგვის კუთხით მიაღწია, და რომელიც ევროპასთან უფრო მჭიდრო ურთიერთობების დამყარებისთვისაა აუცილებელი, ასევე, ოქტომბერში საპრეზიდენტო არჩევნების მშვიდობიანად და გამჭვირვალედ ჩატარების გამო.
აღსანიშნავია ისიც, რომ საქართველომ შესძლო დემოკრატიული გეზის გაგრძელება რუსეთის მხრიდან ზეწოლის მიუხედავად. ბოლო პერიოდში, რუსეთმა ბარიერები აღმართა საქართველოს აფხაზეთისა და სამხრეთ ოსეთის ოკუპირებულ ტერიტორიებზე, სადაც ჯერ კიდევ რჩებიან რუსული შენაერთები მიუხედავად რუსეთის მიერ ნაკისრი ვალდებულებისა დააბრუოს ჯარები 2008 წლის კონფლიქტამდე არსებულ პოზიციებზე . ამერიკის შეერთებულმა შტატებმა კვლავაც უნდა აღიმაღლოს ხმა საქართველოს სუვერენული უფლების დასაცავად თავად გააკეთოს საკუთარი არჩევანი, და უნდა გააგრძელოს საქართველოს მხარდაჭერა, რადგან ის აშენებს დემოკრატიულ და ევროპულ მომავალს საკუთარი ხალხისთვის"- ნათქვამია კონგრესმენის განცხადებაში.
