გერმანიის კანცლერმა ანგელა მერკელმა თავისთვის უჩვეულო ფორმულირებები გამოიყენა და რუსეთი გააფრთხილა უკრაინის, საქართველოსა და მოლდოვის ევროინტეგრაციას ხელი არ შეუშალოს. ინფორმაციას ამის შესახებ გერმანული გაზეთი გაზეთი „Die Welt" ავრცელებს.
„ეს ქვეყნები თავად წყვეტენ. აქ არ არსებობს მესამე ქვეყნების ვეტოს უფლება",_ ციტირებს გაზეთი ანგელა მერკელს.
„დაძაბულობა იზრდება. 28-29 ნოემბერს ვილნიუსში „აღმოსავლეთ პარტნიორობის" ქვეყნების სამიტი უნდა გაიმართოს, რომელზეც სამი სახელმწიფო - უკრაინა, მოლდოვა და საქართველოს ევროკავშირთან დაახლოების თავის კურსის დაკანონებას აპირებს.
უკრაინა 46 მილიონიანი მოსახლეობით მათგან ყველაზე დიდია და ის ევროკავშირთან ასოცირების ხელშეკრულების ხელის მოწერას აპირებს, რომელიც თავისუფალი ვაჭრობის ზონის შექმნას ითვალისწინებს.
მაგრამ ევროკავშირს აღმოსავლეთში კონკურენტი ჰყავს. რუსეთის პრეზიდენტი ვლადიმერ პუტინი ახორციელებს სტრატეგიულ მიზანს, რომელიც მდგომარეობს იმაში, რომ უფრო მჭიდროდ დაიახლოვოს ყოფილი საბჭოთა რესპუბლიკები", _ წერს გაზეთი და აგრძელებს:
„ამის მიღწევის ინსტრუმენტად მოსკოვმა ბელორუსთან და ყაზახეთთან ერთად საბაჟო კავშირი დააარსა, რომელიც უახლოეს მომავალი ევრაზიულ კავშირად გადაიქცევა. ყველაზე უფრო მნიშვნელოვანი ქვეყანა, კი რომლის ხილვაც პუტინს თავისი სატელიტის რანგში სურს - უკრაინაა".
სტატიაში ასევე ნათქვამია, რომ ბოლო თვეების განმავლობაში ევროკავშირის სამი შესაძლო ქვეყანა -პარტნიორის მიმართ მოსკოვი ზეწოლისა და მუქარების პოლიტიკას ატარებდა. პუტინის მრჩევლის სერგეი გლაზნევის განცხადებით, უკრაინისა და ევროკავშირის დაახლოება კიევს ბანკროტით ემუქრება.
„რუსეთის მხრიდან ზეწოლები და უკრაინის ოპოზიციის ლიდერის იულია ტიმოშჩენკოს ჯერ კიდევ გისოსებს მიღმა ყოფნა ბოლო დღეებში ეჭვებს აღძრავს იმასთან დაკავშირებით, სურს თუ არა მართლა და შეუძლია თუ არა უკრაინას პროდასავლური კურსის ერთგული იყოს.
ყოფილი პრემიერის იულია ტიმოშჩენკოს საკითხი, ხომ ჯერაც გადაუწყვეტელია.
ახლა გერმანიის კანცლერი ანგელა მერკელი ცდილობს დაეხმაროს ტიმოშჩენკოს რომელსაც იგი პირადად იცნობს", _ წერს გაზეთი და ასევე აღნიშნავს, რომ ამავდროულად მრავალ ევროპელ პოლიტიკოსს მოთბინება ეწურება.
„იქნება თუ არა ვილნიუსში ხელმოწერილი შეთანხმება უკრაინასა და ევროკავშირს შორის - ჯერ უცნობია. ფედერალურმა კანცლერმა განაცხადა, რომ „ჯერ კიდევ გარკვეული არ არის, აპირებს თუ არა უკრაინა შეთანხმების შესაძლო ხელმოსაწერად პირობების შექმნას".
ამასთან ერთად, გაზეთი აღნიშნავს, რომ „გამოიყენა რა უჩვეულო ფორმულირებები მერკელმა გააფრთხილა რუსეთი უკრაინას ხელი არ შეუშალოს ევროინტეგრაციის პროცესში.
„ეს ქვეყნები თავად წყვეტენ. აქ არ არსებობს მესამე ქვეყნების ვეტოს უფლება",_ განაცხადა მერკელმა და აღნიშნა სხვა ქვეყნების საქმეში ჩაურევლობის პრინციპი არის ეუთოს ქარტიის ნაწილი, რომელსაც მოსკოვმა ხელი მოაწერა.
მერკელმა ასევე კიდევ ერთხელ განუცხადა პუტინს, რომ ევროკავშირის კოტაქტები ისეთ ქვეყნებთან როგორებიც არის უკრაინა, მოლდოვა და საქართველო რუსეთის წინააღმდეგ მიმართული არ არის.
დიპლომატიურ წრეებში არსებული წყარო აცხადებს, რომ ევროკავშირმა ამ დრომდე არ იცის რაზე ესაუბრა იანუკოვიჩი პუტინს ათი დღის წინ. ევროკავშირში მზად არიან იმისთვისაც, რომ შეთანხმების ხელმოწერის შემთხვევაში პუტინი უკრაინის წინააღმდეგ სანქციებს დაწესებს, მაგალითად გაზის მიწოდებას შეუწყვეტს. ამასთან დაკავშირებით ევროპელი დიპლომატები უკვე საუბრობენ იმაზე, რომ უკრაინას გაზი სლოვაკეთიდან მომავალი მილსადენიდან უნდა მიაწოდონ", _ ნათქვამია სტატიის ბოლოს.
