ეკონომიკისა და მდგრადი განვითარების სამინისტრო სტაბილური და პროგნოზირებადი გარემოს შექმნაზე მუშაობს. როგორც დღეს საკომიტეტო მოსმენაზე, ეკონომიკისა და მდგრადი განვითარების მინისტრობის კანდიდატმა გიორგი კვირიკაშვილმა განმარტა, აღნიშნული პრიორიტეტის აღსრულება სპეციალური ნორმატიული აქტის საფუძველზე მოხდება, რისი ინიციატივითაც ეკონომიკის სამინისტრო მალე მიმართავს საკანონმდებლო ორგანოს.
„ჩვენთვის უმნიშვნელოვანესი პრიორიტეტია სტაბილური და პროგნოზირებადი გარემოს შექმნა. ამ მიმართულებით ჩვენ ვაპირებთ, რომ დავგეგმოთ სპეციალური ნორმატიული აქტის საფუძველზე, რეგულირების გავლენის შეფასების სისტემის დანერგვა. ანუ ნებისმიერი ეკონომიკური ინიციატივა თუ ნორმატიული ინიციატივა, რომელიც შეიძლება იქნეს მიღებული და რომელმაც შესაძლოა გავლენა მოახდინოს სამეწარმეო გარემოზე რაოდენობრივი ეფექტი წინასწარ უნდა იქნეს შეფასებული და ამ სისტემის დანერგვას ჩვენ ძალიან დიდი მნიშვნელობას ვანიჭებთ"- განაცხადა კვირიკაშვილმა.
