საქართველოს საგარეო საქმეთა სამინისტროში გაიმართა საქართველოს საგარეო საქმეთა მინისტრის, მაია ფანჯიკიძისა და იაპონიის საგარეო საქმეთა საპარლამენტო ვიცე-მინისტრის და იაპონიის პრემიერ-მინისტრის განსაკუთრებული წარმომადგენლის, ტაკაო მაკინოს შეხვედრა. ტაკაო მაკინო საქართველოში საქართველოს პრეზიდენტის ინაუგურაციის ფარგლებში იაპონიის დელეგაციას ხელმძღვანელობს, რომელშიც საგარეო საქმეთა საპარლამენტო ვიცე-მინისტრის აღმასრულებელი თანაშემწე, დაისუკე იჩიკავა, საგარეო საქმეთა სამინისტროს ცენტრალური აზიის და კავკასიის საქმეთა ქვედანაყოფის დირექტორი, ჯუნ ნანაზავა და ამავე ქვედანაყოფის თანამშრომელი, ტოშიფუმი იტო შედიან.
საქართველოს საგარეო საქმეთა მინისტრმა იაპონელ სტუმარს მიაწოდა ამომწურავი ინფორმაცია საქართველოს შიდა და საგარეო პოლიტიკის პრიორიტეტებზე. იაპონიის საგარეო საქმეთა საპარლამენტო ვიცე-მინისტრმა დადებითად შეაფასა საქართველოში მიმდინარე მოვლენები და ჩატარებული საპრეზიდენტო არჩევნები.
საგარეო საქმეთა სამინისტროს ინფორმაციით, შეხვედრისას მხარეებმა განიხილეს ორმხრივი თანამშრომლობის მნიშვნელოვანი საკითხები. დადებითად შეფასდა საქართველოს და იაპონიას შორის არსებული მჭირდრო და მეგობრული ურთიერთობები. განსაკუთრებული ყურადღება დაეთმო ეკონომიკურ სფეროში თანამშრომლობის განვითარებას და იაპონური ინვესტიციების წახალისებას საქართველოში.
პოზიტიურად აღინიშნა საქართველოს ეკონომიკური და მდგრადი გავითარების სამინისტროსა და იაპონიის საერთაშორისო თანამშრომლობის სააგენტოს (JICA) შორის არსებული თანამშრომლობა და დაგეგმილი პროექტები, რომელიც ხელს შეუწყობს ორი ქვეყნის კერძო ბიზნესისთვის თანამშრომლობის პლატფორმის შექმნას.
