ეუთო-ს მუდმივი საბჭოს 971-ე პლენარულ სხდომაზე საქართველოში არსებული კონფლიქტის განხილვა მოეწყო. სხდომაზე მოხსენებით წარსდგნენ ჟენევის საერთაშორისო მოლაპარაკებების თანათავმჯდომარეები: ევროკავშირის სპეციალური წარმომადგენელი სამხრეთ კავკასიაში ფილიპ ლეფორი, გაერო-ს გენერალური მდივნის წარმომადგენელი ანტი ტურუნენი და ეუთო-ს უკრაინის თავმჯდომარეობის სპეციალური წარმომადგენელი ანდრეი დეშიტსა.
სხდომაზე განცხადება გააკეთა ეუთო-ში საქართველოს მუდმივმა წარმომადგენელმა, ელჩმა კონსტანტინე ზალდასტანიშვილმა, რომელმაც ეუთო-ს მუდმივ საბჭოს დეტალური ინფორმაცია მიაწოდა საქართველოს ოკუპირებულ ტერიტორიებზე შექმნილ ვითარებასა და ჟენევის საერთაშორისო მოალპარაკებების მიმდინარეობის შესახებ. საქართველოს ელჩმა ხაზი გაუსვა ჟენევის საერთაშორისო მოლაპარაკებების, როგორც 2012 წლის 12 აგვისტოს ცეცხლის შეწყვეტის შეთანხმების შესრულებასთან დაკავშირებული საკითხების განხილვის ფორმატის დიდ მნიშვნელობას. მან დაწვრილებით ისაუბრა რუსეთის მიერ საერთაშორისო სამართლის ძირითადი პრინციპებისა და 2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების უხეში დარღვევის ფაქტებზე. საქართველოს ელჩმა ეუთო-ს 57 წევრი ქვეყნის ყურადღება კიდევ ერთხელ გაამახვილა საქართველოს ტერიტორიაზე, საოკუპაციო ხაზის გასწვრივ, რუსეთის საოკუპაციო ჯარის მიერ, მავთულხლართებისა და სხვა სახის დაბრკოლებების უკანონოდ მოწყობის პროცესზე, რაც ადგილობრივი მაცხოვრებლების ჰუმანიტარულ, სოციალურ და ეკონომიკურ მდგომარეობაზე უკიდურესად უარყოფით გავლენას ახდენს. კონსტანტინე ზალდასტანიშვილმა თავის განცხადებაში განსაკუთრებული აქცენტი გააკეთა რუსეთის მიერ ძალის არგამოყენების სამართლებრივი ვალდებულების აღების აუცილებლობაზე. მან ასევე ისაუბრა ოკუპირებულ ტერიტორიებზე და საუკუპაციო ხაზის გასწვრივ მცხოვრები მოსახლეობის გაუსაძლისი პირობების გამოსწორების, ლტოლვილთა და ადგილნაცვალ პირთა თავიანთ მუდმივ საცხოვრებელ ადგილებში უსაფრთხოდ და ღირსეულად დაბრუნების და ადამიანის ფუნდამენტური უფლებების დაცვის აუცილებლობაზე. საქართველოს ელჩმა კიდევ ერთხელ მოუწოდა რუსულ მხარეს აღებული ვალდებულებების შესრულებისა და კონსტრუქციული დიალოგისკენ.
სხდომაზე ქართული მხარის მხარდამჭერი განცხადებები გაკეთეს ევროკავშირის, აშშ-ს, შვეიცარიის და თურქეთის ელჩებმა, რომლებმაც კიდევ ერთხელ დაუჭირეს მხარი საქართველოს სუვერენიტეტსა და ტერიტორიულ მთლიანობას, მის საერთაშორისოდ აღიარებული საზღვრების ფარგლებში, დაგმეს საუკუპაციო ხაზის გასწვრივ მავთულხლართებისა და სხვა დაბრკოლებების აგების პროცესი და კიდევ ერთხელ მოუწოდეს რუსეთის ფედერაციას, პატივი სცეს საერთაშორისო სამართლის ნორმებს, მათ შორის, შეასრულოს 2008 წლის 12 აგვისტოს ცეცხლის შეწყვეტის შეთანხმების დებულებები.