. საქართველოს პრეზიდენტი მიხეილ სააკაშვილი კიდევ ერთხელ შეეხო მოღალატეების თემას. მისი თქმით, მიუხედავად იმისა, რომ ქვეყანაში კვლავ არსებობენ ფილიპე მახარაძეები და სერგო ორჯონიკიძეები საქართველო მაინც შეიანარჩუნებს დამოუკიდებლობას და არვის მეორეხარისხოვანი დანამატი არ გახდება.
ამის შესახებ მიხეილ სააკაშვილმა ბათუმში, ახლად რეაბილიტირებულ თურქულ სკოლა-ლიცეუმში ისაუბრა.
"ჩვენ ბევრად უკეთესი პერსპექტივა გვაქვს ვიდრე ვინმეს წარმოუდგენია. თავის დროზე ნოე ჟორდანია მიმართავდა ერთა ლიგას და რუსეთს იგი იძახდა _ ჩვენ ვთხოვთ და მივმართავთ რუსეთს _ ისინი გვეუბნებიან დაბრუნდით ჩვენთან, ჩვენ ვეუნებით არ გვინდა თქვენთან დაბრუნება, მოდით ყველა ერთად წავიდეთ ევროპაში. რა თქმა უნდა იმავე დროს იყვნენ ამხანაგი ფილიპე მახარაძე, ამხანაგი ორჯონიკიძე, რომლებიც ამბობდნენ _ არ გვინდა ევროპა, არ გვინდა რუსეთთან ერთად წასვლა ევროპაში და მოდით ყველანი ერთად დავბრუნდეთ რუსეთში, იმიტომ, რომ რუსეთი არის ძლიერი და მომავლის მქონე სახელმწიფო და იქ უკეთესად ვიქნებით", - განაცხადა სააკაშვილმა.
საქართველოს პრეზიდენტის განცხადებით ორივე მხარე ცდებოდა, რადგან მათი მოსაზრებები ისევ რუსეთის ეფექტიდან გამომდინარეობდა.
"მინდა გითხრათ, რომ ორივენი ცდებოდნენ _ რა თქმა უნდა ჟორდანიას უნდოდა საქართველოს დამოუკიდებლობა, მე მას არც შევადარებ იმ მოღალატეებს, რომლებიც უცხო ქვეყნის ჯარს შემოუძღვნენ ჩვენს ქვეყანაში, მაგრამ ჟორდანიასაც და საქართველოს მოღალატე ჯგუფებსაც სამწუხაროდ ჰქონდათ ერთი რამ, რაც მათ აერთიანებდათ _ მათ ორივეს ვერ წარმოედგინათ საქართველო რუსეთის გარეშე.
ჩვენ, ჩვენმა მთავრობამ და ყველამ გავაკეთეთ არჩევანი. ჩვენ ვიქნებით ევროპაში, ჩვენ ვიქნებით თავისუფლები, როგორც ქართველები, როგორც თავისუფალი ქვეყნის მრავალეთნიკური ერი და ეს მოხდება რუსეთის გარეშე. საქართველო არავის მეორეხარისხოვანი დანამატი არც ერთ შემთხვევაში არ იქნება, არც ევროპისკენ მოძრაობაში და არც მითუმეტეს იმ იმპერიაში, სადაც ჯერ კიდევ უკან გვექაჩებიან", - აღნიშნა პრეზიდენტმა.
.
