აგრარულ სექტორში წამყვანმა კომპანია "კარტლისმა" გარდაბნის რაიონის სოფელ სართიჭალაში ამერიკული კომპანია „პიონერი"-ს წარმოშობის ჰიბრიდული სიმინდის მოსავლის აღების პრეზენტაცია გამართა.
„კარტლისი"-ს მენეჯმენტში აცხადებენ, რომ სოფელ სართიჭალაში დათესილი კომპანია „პიონერის" წარმოების აღნიშნული სამი ჰიბრიდი - PR32F73, PR31Y43, P1921 ბოლო სამი წელია, საქართველოს სხვადასხვა რეგიონში ითესება და სწორი მოვლის პირობებში საუკეთესო შედეგს იძლევა.
„კომპანია „პიონერი" მსოფლიოში მაღალმოსავლიანი და გამძლე ჰიბრიდებით არის ცნობილი. აღნიშნულ 3 ჰიბრიდს- PR32F73, PR31Y43, P1921-ს კარგი მოვლის პირობებში, გააჩნია მოსავლიანობის ძალიან მაღალი პოტენციალი 12-14 ტონა 1 ჰა-ზე, მაშინ, როდესაც საქართველოში გავრცელებული ჯიშების სიმინდი ჰექტარზე 2-5 ტონამდე მოსავალს იძლევა,"- განაცხადა კომპანია კარტლისის დირექტორმა რობერტ რევიამ.
კომპანიის პროგნოზი გამართლდა - სართიჭალაში აღებულმა მოსავალმა ერთ ჰექტარზე 11.8 ტონა სიმინდს გადააჭარბა, რაც საქართველოს პირობებში ძალიან კარგ შედეგად ითვლება. „PR32F73, PR31Y43, P1921-ს ჰიბრიდები ყველაზე კარგ შედეგს გორის, ბოლნისის, მარნეულის და ლაგოდეხის რაიონებში იძლევა. სამწლიანმა პრაქტიკამ აჩვენა, რომ აღნიშნული ჰიბრიდები ძალიან კარგად ერგებიან ქართულ ჰავას და მიწას."- განმარტავს რობერტ რევია.
სართიჭალაში გამართულ ღონისძიებაზე სამხრეთ-აფრიკული კომპანია "Agrico"-ს წარმოებული თანამედროვე სარწყავი სისტემის - „ცენტრალური პივოტის" პრეზენტაციაც მოეწყო. რომელიც აღნიშნულ ნაკვეთშია დამონტაჟებული.
სოფელ სართიჭალაში მდებარე სიმინდის ყანა 50 ჰექტარ ფართობზეა დათესილი და იგი სამხრეთ აფრიკელი ფერმერის (ბურის) საკუთრებაა.
„ჰიბრიდული სიმინდი თავიდან ბოლომდე კომპანია „კარტლისის" მიერ დამუშავებული ტექნოლოგიით არის მოყვანილი. სწორედ „კარტლისის" სპეციალისტებმა შეგვირჩიეს სიმინდის ჯიშები, ნიადაგის დამუშავების მეთოდი, განსაზღვრეს სასუქის სახეობა, საჭირო რაოდენობა და შეტანის სქემა, შეარჩიეს შესაბამისი ჰერბიციდები და მათი გამოყენების გზები. მიღებული მოსავლის რაოდენობით ძალიან კმაყოფილი ვარ. მომავალში კომპანია „კარტლისთან" უფრო მჭიდრო თანამშრომლობას ვგეგმავ." - აცხადებს ნაკვეთის მფლობელი ბური - ბენჯამინ დევეტ ჰარცენბერგი.
აღნიშნულ ღონისძიებას, სხვადასხვა რაიონებიდან ჩამოსულ ფერმერებთან ერთად, საქართველოში მოღვაწე უცხოელი ფერმერები, ინვესტორები და მედიის წარმომადგენლები დაესწრნენ. მოსავლის აღებაზე სტუმრები აზერბაიჯანიდან და სომხეთიდანაც იმყოფებოდნენ. პრეზენტაციას ასევე დაესწრო სპეციალურად ამ დღისთვის შვეიცარიიდან ჩამოსული სტუმარი - კომპანია „პიონერის" ბაზრის განვითარების მენეჯერი ბ-ნი სერდარ ტულუკტორამანი.
სერდარ ტულუკტორამანის განცხადებით, კომპანია „პიონერი" საქართველოში 7 წლის წინ შემოვიდა და პირველ წლებში, მოსავალი ჰექტარზე 6-7 ტონას შეადგენდა. „მოხარული ვარ, რომ ამ წლების განმავლობაში ქართველმა ფერმერებმა კარგად შეისწალეს მოსავლის მოყვანის ტექნოლოგიები. წელს ზოგიერთმა ფერმერმა, 1 ჰექტარზე 14-14,5 ტონა სიმინდი აიღო." - განაცხადა სერდარ ტულუკტორამანის.
ღონისძიებას საპატრიარქოს პროექტის - „გახდი ფერმერი"-ს მონაწილეებიც დაესწრნენ და მოსავლის აღების პროცესში საკუთარი წვლილი შეიტანეს. კომპანია „კარტლისმა" საპატრიარქოსთან ერთად თანამშრომლობის მემორანდუმი რამდენიმე დღის წინ გააფორმა. პროექტი 15 ახალგაზრდის სოფლის მეურნეობის სპეციალისტად აღზრდას ითვალისწინებს. საპატრიარქოს პროექტის მხარდასაჭერად, კომპანია „კარტლისმა" ორწლიანი თანამშრომლობის ფარგლებში 30 000 ლარი გამოყო.
კომპანია „კარტლისი" (ყოფილი „გარემო და ანალიტიკა") 1997 წელს დაარსდა და მუშაობს სოფლის მეურნეობაში არსებული ყველა მიმართულებით: სათესლე მასალა, სასუქები, მცენარეთა დაცვის საშუალებები, საირიგაციო სისტემები, სასოფლო - სამეურნეო კულტურების წარმოება. ამ დროისთვის იგი თანამშრომლობს სოფლის მეურნეობის მიმართულების ისეთ მსოფლიო ბრენდებთან როგორებიცაა: DuPont, Pioneer, FMC, Bejo, TimacAgro და HZPC. კომპანიას გააჩნია ფერმერთა მომსახურების ცენტრები და სავაჭრო ობიექტები საქართველოს სხვადასხვა რეგიონში მათ შორის: ლაგოდეხში, ბოლნისში, წნორში, გორში,ზუგდიდში და სხვა რაიონულ ცენტრებში. „კარტლისი" პრესტიჟული ამერიკული ჯილდოს „ENVIRONMENTAL RESPECT AWARDS"- ის მფლობელია. კომპანიას ჯილდო პესტიციდების დისტრიბუციის საუკეთესო მენეჯმენტისთვის გადაეცა.