"ლეიბორისტული პარტიის" ლიდერი შალვა ნათელაშვილი სოჭის ოლიმპიადაზე დასწრებასთან დაკავშირებით არჩეული პრეზიდენტის გიორგი მარგველასვილის მიერ გაკეთებულ განცხადებას სამშობლოს ღალატს უწოდებს.
"გაყალბების გზით გაყვანილი ცრუ პრეზიდენტის განცხადება სხვა არაფერია, თუ არა სამშობლოს გაქანებული ღალატი იმ ფონზე, როდესაც წაგვართვეს მიწები, დაგვიხოცეს ბიჭები, დაგვიწიოკეს ფუძეები, გამოგვიყარეს ხალხი, გადაგვიღობეს გზები და ეზოები. ამ ყველაფრის ფონზე, ოლიმპიადაზე ჩასვლა და იქ კოქტეილის წრუპვა არის სამშობლოს ღალატი,"- განაცხადა შალვა ნათელაშვილმა.
ცნობისთვის, არჩეულმა პრეზიდენტმა გიორგი მარგველაშვილმა რუსული ტელეკომპანია "ORT"-სთვის მიცემულ ინტერვიუში რუსეთ-საქართველოს ურთიერთობებზე, სოჭის ოლიმპიადაზე და აღნიშნულ ოპლიმპიადაზე მისი ვიზიტის შესაძლებლობაზე ისაუბრა.
მარგველაშვილის თქმით, ეს შესაძლოა გახდეს კარგი დასაწყისი იმისათვის, რომ საქართველოსა და რუსეთს შორის დაწყებული პოლიტიკური დაძაბულობის დონე დაიწიოს.
ჟურნალისტის კითხვაზე - ლიდერები ხშირად ჩამოდიან თავიანთი გუნდების მხარდასაჭერად, ან ოლიმპიადის დახურვაზე და გახსნაზე. თქვენ აპირებთ ჩამოსვლას?, მარგველაშვილმა უპასუხა, რომ ამ საკითხს გუნდში განიხილავს და შესაბამის გადაწყვეტლებას მხოლოდ ამის შემდეგ მიიღებს.
"ჩვენ განვიხილავთ ამ საკითხს, ჩვენს გუნდში ის ღიად განიხილება. ვთვლით, რომ ეს კარგი დასაწყისია, რათა არ შეიქმნას პოლიტიკური დაძაბულობა. იმიტომ ვუყურებთ ოლიპმიადას მოლოდინით, რომ სპორტული ნების კეთილი ემოცია მისცემს სტარტს ახალ ურთიერთობებს არამხოლოდ რუსეთში, არამედ მთელ მსოფლიოში,"- განაცხადა გიორგი მარგველაშვილმა.
