მოქმედი შინაგან საქმეთა მინისტრი და მომავალი პრემიერი ირაკლი ღარიბაშვილი არ ადასტურებს ინფორმაციას იმის შესახებ, რომ მასსა და მთავარ პროკურორ არჩილ კბილაშვილს შორის რაიმე სახის დაპირისპირება არსებობდა.
"არავითარი უთანხმოება არ არსებობს ჩემსა და არჩილს შორის, ასე რომ არ ვიცი,"- განაცხადა ღარიბაშვილმა ჟურნალისტის მიერ დასმული კითხვის საპასუხოდ, რომელშიც არჩილ კბილაშვილის მიერ გუშინ გაკეთებული განცხადებიდან ციტატაც იყო მოყვანილი.
საქართველოს მთავარმა პროკურორმა არჩილ კბილაშვილმა თანამდებობიდან გადადგომის თაობაზე განცხადება გუშინ გამართულ საგანგებო ბრიფინგზე გააკეთა. კბილაშვილმა უარყო ინფორმაცია, რომ მას პრემიერ-მინისტრობის კანდიდატ ირაკლი ღარიბაშვილთან რაიმე სახის უთანხმოება აქვს, თუმცა აღნიშნა, რომ მას და ირაკლი ღარიბაშვილს პრიორიტეტებზე განსხვავებული შეხედულებები ჰქონდათ.
"ჩვენს შორის ღირსეული კოლეგიალური ურთიერთობა ჩამოყალიბდა. ჩვენ ჩვენს კოლეგებთან ერთად არაერთი დღე და ღამე გაგვიტარებია ერთად დანაშაულთან ბრძოლაზე ფიქრში და შემიძლია ვთქვა, რომ ირაკლი ღირსებითა და წესიერებით სავსე ადამიანია. რასაკვირველია ჩვენ გვქონდა და გვაქვს განსხვავებული შეხედულებები პრიორიტეტებთან, გამოწვევებთან და სამართალდაცვით სფეროში გასატარებელ რეფორმებთან დაკავშირებით, მაგრამ აღნიშნული ერთ გუნდში მყოფი საერთო მიზნის მქონე თანამებრძოლების განსხვავებული შეხედულებებია, რაც ყოველკთვის არსებობდა და მომავალშიც იარსებებს ბიძინა ივანიშვილის რეფორმატორთა გუნდში. მე წარმატებები მინდა ვუსურვო მას ახალ ასპარეზზე. პროკურატურაში გატარებული ერთი წელი ჩემთვის მრავლის შემმეცნებელი იყო. პრემიერ ივანიშვილის წყალობით მე საშუალება მომეცა პირველად ჩემს ცხოვრებაში მემსახურა სახელმწიფო სამსახურში და თანაც ესოდენ მაღალ თანამდებობაზე,"- განაცხადა არჩილ კბილაშვილმა.
