„საქსტატის" ახალი აღმასრულებელი დირექტორის დანიშვნა გიორგი მარგველაშვილს მოუწევს. ზაზა ჭელიძე, რომელიც „საქსტატს" თითქმის 4 წლის განმავლობაში ხელმძღვანელობდა თანამდებობიდან საკუთარი სურვილით გადადგა და ამიერიდან მუშაობას სხვა სამსახურში გააგრძელებს. აღსანიშნავია, რომ „საქსტატის" აღმასრულებელ დირექტორს კანონით გათვალისწინებული 4 წლიანი ვადა დეკემბერში ეწურებოდა, თუმცა ზაზა ჭელიძემ გადაწყვეტილება მიიღო და დაკავებული თანამდებობა, დაახლოებით ერთი თვით ადრე დატოვა.
„კანონით დადგენილი 4 წლიანი ვადის გასვლის და სხვა სამსახურში გადასვლის გამო, აღარ ვმუშაობ „საქსტატში".
მინდა დიდი მადლობა გადავუხადო „საქსტატის" თითოეულ თანამშრომელს, „საქსტატის" საბჭოს, სტატისტიკური ინფორმაციის ყველა მომხმარებელს, ყველა პარტნიორ ადგილობრივ თუ საერთაშორისო ორგანიზაციას და დონორს ხარისხიანი და წარმატებული თანამშრომლობისთვის"- წერს ზაზა ჭელიძე საკუთარი „ფეისბუკის" გვერდზე.
როგორც სსიპ საქართველოს სტატისტიკის ეროვნული სამსახურის მოქმედ დებულებაშია აღნიშნული, „საქსტატის" აღმასრულებელ დირექტორს „საქსტატის" საბჭოს წარდგინებით,
,,ოფიციალური სტატისტიკის შესახებ" საქართველოს კანონის მე-11 მუხლის მე-4 პუნქტით გათვალისწინებულ საბჭოს წევრთაგან 4 წლის ვადით თანამდებობაზე ნიშნავს და თანამდებობიდან ათავისუფლებს საქართველოს პრეზიდენტი.
შესაბამისად გიორგი მარგველაშვილის ინაუგურაციის შემდეგ მას „საქსტატის" ახალი აღმასრულებელი დირექტორის შერჩევა და დამტკიცება მოუწევს.
აღსანიშნავია, რომ აღმასრულებელი დირექტორის არყოფნის შემთხვევაში, მის მოვალეობას ასრულებს ერთ-ერთი მოადგილე.
