საქართველოს მომავალი პრემიერ-მინისტრის ირაკლი ღარიბაშვილის განცხადებით, თავდაცვის მინისტრი ირაკლი ალასანია და იუსტიციის მინისტრი თეა წულუკიანი ახალ მინისტრთა კაბინეტში თანამდებობებს შეინარჩუნებენ.
როგორც ღარიბაშვილმა საგურამოში, ილია ჭავჭავაძის იუბილისადმი მიძღვნილ ღონისძიებაზე დასწრების შემდეგ ჟურნალისტებთან საუბრისას აღნიშნა, ქვეყნის ახალ მთავრობაში სერიოზული ცვლილებები არ იგეგმება, გარდა რამდენიმე სიახლისა.
ღარიბაშვილი ერთ-ერთ სიახლედ მთავარი პროკურორის პოსტზე ფინანსთა სამინისტროს საგამოძიებო სამსახურის უფროსის ოთარ ფარცხალაძის დანიშვნას და შს მინისტრის პოსტზე მის შემცვლელს ასახელებს, თუმცა ვინ დაიკავებს შინაგან საქმეთა მინისტრის პოსტს, ღარიბაშვილს არ დაუკონკრეტებია.
