ექსპერტი მამუკა არეშიძე თვლის, რომ მთავარი პროკურორის პოსტიდან არჩილ კბილაშვილის გადადგომა ან გათავისუფლება ადრე თუ გვიან მოსალოდნელი იყო და ეს გადაწყვეტილება პრემიერ-მინისტრ ბიძინა ივანიშვილის გარეშე ვერ მიიღებოდა.
როგორც არეშიძემ "ჯი-ეიჩ-ენთან" საუბრისას აღნიშნა, არჩილ კბილაშვილი პირად საუბრებში აცხადებდა, რომ მისთვის ძალიან რთული იყო იმ ჩარჩოებში მუშაობა, რომელიც სახელმწიფო პოლიტიკამ შეუქმნა.
"კოჰაბიტაცის ფორმალური, ევროპული ნაწილი დასრულდა, რომელიც გულისხმობს იმას, რომ პრეზიდენტი და პრემიერ-მინისტრი სხვადასხვა პოლიტიკური პარტიების წარმომადგენლები არ არიან. ევროპული ტიპის კოჰაბიტაცია დამთავრდა, მაგრამ კავკასიური ტიპის კოჰაბიტაცია გრძელდება, რომელიც გულისხმობს "ნაციონალურ მოძრაობასთან", როგორც მთავარ ოპოზიციური პოლიტიკურ პარტიასთან თანამშრომლობას და თანაცხოვრებას. კბილაშვილის განცხადებიდან ასევე ჩანს, რომ მას გარკვეულწილად განსხვავებული პოზიციები ჰქონდა პრემიერ-მინისტრის პოზიციებთან შედარებით.ის ითხოვდა რეფორმებს დაჩქარებული წესით და რომელია ამ საქმეში მართალი, რთული სათქმელია, რადგან ჩემთვის უცნობია რეფორმებში რას გულისხმობს და როგორი ტიპის რეფორმებს გულისხმობს იგი,"- განაცხადა მამუკა არეშიძემ.
რაც შეეხება კბილაშვილსა და ივანიშვილს შორის არსებული დაძაბული ურთიერთობის თაობაზე გავრცელებულ ინფორმაციას, არეშიძე მიიჩნევს, რომ მან ძალიან კარგად იცის ბიძინა ივანიშვილის პირადი დამოკიდებულება არჩილ კბილაშვილისადმი და მის პიროვნულ თვისებებს პატივს სცემს.
"მე ვიცი ივანიშვილის დამოკიდებულება კბილაშვილის მიმართ და ძალიან დიდ პატივს სცემს მას პირადად. ის პატივისცემას ნამდვილად იმსახურებს როგორც პიროვნება, მაგარ ზოგ შემთხვევაში მას ამ შეზღუდულ ჩარჩოებშიც შეეძლო უფრო მოქნილი და ეფექტური ყოფილიყო. მისი ერთადერთი შემთხვევა, როდესაც მყარი პოზიცია დაიკავა, მე როგორც მახსოვს იყო ბედუკაძის შემთხვევა,"- აღნიშნა არეძიძემ.
