წარმოიქმნა მიშას თაობა და ამ ხალხის შენარჩუნება ჩვენთვის ძალიან მნიშვნელოვანია,- ამის შესახებ საქართველოს პრეზიდენტმა ყვარელში, სტუდენტებთან შეხვედრისას ისაუბრა.
მიხეილ სააკაშვილის განცხადებით, მას ჰქონდა დიდი პრივილიეგია და უზომოდ მადლიერია ქართველი ხალხის, რომ 9 წლის განმავლობაში ჰქონდა შესაძლებლობა ხალხის მანდატით ყველაფერი გაეკეთებინა საქართველოს უკეთესობისკენ შესაცვლელად.
სააკაშვილის თქმით, "ჩვენ შევცვალეთ არა მხოლოდ საქართველო, არამედ მთელი პოსტსაბჭოთა სივრცე და ის აღარასდროს არ იქნება ძველებური".
"მე უზომოდ მადლიერი ვარ იმ ხალხის, ვინც ამას აკეთებდა,"- აღნიშნა პრეზიდენტმა.
ქვეყნის პირველი პირის თქმით, როდესაც ლაპარაკობენ იმას, რომ მიშამ ააშენა ბათუმი, თელავი, ყვარელი თუ აშენებდა ლაზიკას, ძველი ქალაქების ახალ ადგილებს, ეს რა თქმა უნდა, კონკრეტული ადამიანების გაკეთებულია და მას უშუალოდ სამშენებლო სამუშაოებში მონაწილეობა არ მიუღია.
"მე არც სამშენებლო ტექნიკის გამოყენება ვიცი კარგად და დიდად არც ფიზიკურად მიშრომია. ყველაფერს კონკრეტული ადამიანები, ჩენი მოქალაქეები აშენებდნენ. ამას წინათ ვთქვი და გავიმეორებ, რომ წარმოიქმნა მიშას თაობა, მიშასდროინდელი თაობა, ქართველების, ჩვენი თანამემამულეების, საქართველოში მცხოვრები ყველა ეთნიკური ჯგუფის წარმომადგენლის. ამ ხალხის შენარჩუნება ჩვენთვის ძალიან მნიშვნელოვანია. ასევე მნიშვნელოვანია, კარგმა სპეციალისტებმა, ჩვენმა ხალხმა არ დატოვოს საქართველო,"- განაცხადა მიხეილ სააკაშვილმა.
რაც შეეხება პრეზიდენტის ავლაბრის რეზიდენციის საკითხს, სააკაშვილი მიიჩნევს, რომ ახლა მთავარია მომავალზე ვიყოთ ორიენტირებული და არ უნდა იყოს კამათი იმაზე, თუ რა უნდა განთავსდეს პრეზიდენტის სასახლეში.
"აი, მაგალითად, მთელი ამ დღეების განმავლობაში მიდის საშინელი კამათი იმის შესახებ, თუ რა უნდა იყოს პრეზიდენტის სასახლეში. საქართველოს მრვალი საუკუნეა არ ჰქონია სასახლე, რადგან დამპყრობელს არ უნდოდა ეს. ეს ჩვენი სახელმწიფოებრიობის სიმბოლოა. ეს შენობა მხოლოდ პრეზიდენტის სასახლე უნდა იყოს - სხვა არაფერი, რადგან ასეა აშენებული და ის არ ყოფილა მორგებული მიშაზე. ის საუკუნეების განმავლობაში უნდა დარჩენილიყო,"- დასძინა პრეზიდენტმა
