საქართველოს იუსტიციის მინისტრის მოადგილე გოჩა ლორთქიფანიძე შვეიცარიაში ჟენევის მოლაპარაკებების მორიგ - 25-ე რაუნდში, მონაწილეობს.
დღეს, 5 ნოემბერს, დაგეგმილია საინფორმაციო შეხვედრები, სადაც საერთაშორისო ექსპერტები მოლაპარაკების მხარეებს შეხვდებიან და პრეზენტაციას წარუდგენენ გადაადგილების თავისუფლების შესახებ - როგორია საერთაშორისო-ჰუმანიტარული და ადამიანის უფლებების პრაქტიკა ამ საკითხზე. ხვალ, 6 ნოემბერს კი, სამუშაო ჯგუფების შეხვედრა იგეგმება.
პირველი სამუშაო ჯგუფის შეკრებაზე, ოკუპირებულ ტერიტორიებზე უსაფრთხოების საკითხთან ერთად, რუსეთის ფედერაციის მიერ ძალის გამოუყენებლობის საკითხსა და საერთაშორისო უსაფრთხოების მექანიზმებზე იქნება საუბარი.
მეორე სამუშაო ჯგუფის შეხვედრაზე ოკუპირებულ ტერიტორიებზე დევნილთა დაბრუნებისა და ცხინვალის რეგიონში წყლისა და ბუნებრივი აირის მიწოდების საკითხებზე საუბარია დაგეგმილი. ორივე სამუშაო ჯგუფში მონაწილეები ინდივიდუალური სტატუსით არიან წარმოდგენილნი.
როგორც იუსტიციის მინისტრის მოადგილე გოჩა ლორთქიფანიძემ განაცხადა, „ცხინვალის რეგიონში, საოკუპაციო ხაზის მიმდებარედ, ბოლო დროს დაფიქსირებული ფაქტები, როგორებიცაა: მავთულხლართების აღმართვა, მოქალაქეებისთვის საკუთრების უფლების ხელყოფა, თავისუფალი გადაადგილების შეზღუდვა, ქართული დელეგაციის მხრიდან უდავოდ საჭიროებს რეაგირებას. იმედი მაქვს, ხვალ ამ საკითხების პრინციპულად და სრულფასოვნად განხილვის შესაძლებლობა მოგვეცემა".
საქართველოს იუსტიციის სამინისტრო ჟენევის მოლაპარაკებების პროცესში მოლაპარაკებების აღნიშნული ფორმატის შექმნის პირველივე დღიდან მონაწილეობს. სამუშაო ჯგუფში წამოჭრილი ნებისმიერი საკითხის - მათ შორის, ძალის გამოუყენებლობის - საერთაშორისო-სამართლებრივი შეფასება, ადამიანის უფლებების დაცვის თვალსაზრისით, სწორედ საქართველოს იუსტიციის სამინისტროს პრეროგატივაა. დელეგაციას საქართველოს საგარეო საქმეთა სამინისტროს წარმომადგენელი ხელმძღვანელობს.
