არჩეული პრეზიდენტის, გიორგი მარგველაშვილის ინაუგურაციაზე მიწვეული სტუმრების სიაში საქართველოს ყოფილი პრეზიდენტები, ედუარდ შევარდნაძე და მიხეილ სააკაშვილიც არიან.
17 ნოემბრის ინაუგურაციის ღონისძიების დეტალები ჟურნალისტებს საორგანიზაციო ჯგუფის წარმომადგენელმა, საგარეო საქმეთა მინისტრმა მაია ფანჯიკიძემ გააცნო.
მინისტრის თქმით, აღნიშნული ღონისძიება მინიმალური დანახარჯებით, პომპეზურობის გარეშე ჩაივლის. რაც შეეხება უშუალოდ ინაუგურაციის ცერემონიალისთვის საჭირო სცენას და სხვა დეტალებს, საორგანიზაციო ჯგუფის წევრთა გადაწყვეტილებით, ღონისძიება თბილისის პარლამენტის შენობის შიდა ეზოში მოეწყობა.
პრეზიდენტის ინაუგურაციაზე სამხედრო კომპონენტები მხოლოდ ჯარისკაცების და მინიმალური სახედრო აღჭურვილობის სახით იქნება წარმოდგენილი. როგორც მაია ფანჯიკიძემ აღნიშნა, მძიმე ტექნიკა, ავიაცია და სხვა ტიპის მსხვილი სამხედრო ელემენტები ინაუგურაციის ღონისძიებაზე არ იქნება წარმოდგენილი.
საქართველოს პრეზიდენტის ინაუგურაციას 70-მდე ქვეყნის წარმომადგენელი დაესწრება. ოფიციალურად მოწვეულ სტუმრებს შორის რუსეთის ფედერაციის დელეგაციის წევრები არ იქნებიან.
17 ნოემბერს თბილისის პარლამენტის შენობის გარდა მცირე ღონისძიება გმირთა მოედანზეც გაიმართება, სადაც პრეზიდენტი მარგველაშვილი ტერიტორიული მთლიანობისთვის დაღუპულთა ხსოვნას პატივს მიაგებს.
ინაუგურაციის ცერემონიალი შოთა რუსთაველის სახელობის სახელმწიფო დრამატულ თეატრში დაგეგმილი კონცერტით დასრულდება. საკონცერტო პროგრამა მთლიანად ქართველი შემსრულებლებით დაკომპლექტდა და ღონისძიბაში მონაწილეობას უცხოეთიდან მოწვეული არც ერთი მუსიკოსი არ მიიღებს.
