პრეზიდენტის ავლაბრის რეზიდენცია განათლების სამინისტროს გადაეცემა და მასში სავარაუდოდ, ქართულ-ამერიკული უნივერსიტეტი იფუნქციონირებს.
განათლების და მეცნიერების მინისტრის თამარ სანიკიძის განცხადებით, აღნიშნულ შენობაში ტექნოლოგიური უნივერსიტეტის განთავსებაზე საუბარი არ ყოფილა.
"შემიძლია გაგანდოთ ინფორმაცია, რომელსაც დღეს ვფლობ პრეზიდენტის რეზიდენციასთან დაკავშირებით. მე გუშინ მქონდა საუბარი ბატონ გიორგი მარგველაშვილთან, რომელმაც შემოგვთავაზა და რომლის ინიციატივაც არის, რომ ეს შენობა გამოვიყენოთ საგანმანათლებლო სფეროში. მე ვფიქრობ და ჩემი მოსაზრება არის, რომ ეს შენობა უნდა გამოვიყენოთ მილენიუმის მეორე პროექტის ფარგლებში, სადაც ვფიქრობთ ქართულ-ამერიკული უნივერსიტეტის დაფუძნებას. მე მგონი, ძალიან შესაფერისი და კარგი იქნებოდა ამ საქმიანობისთვის ამ შენობის გამოყენება,"- განაცხადა თამარ სანიკიძემ.