პრეზიდენტის ადმინისტრაციის ხელმძღვანელი ანდრო ბარნოვი მიხეილ სააკაშვილის მიერ ბაჩო ახალაიას შეწყალების აქტზე ხელმოწერის მიზეზებს განმარტავს და აცხადებს, რომ აღნიშნულის მიზეზი ის ფაქტი გახდა, რომ ქვეყანაში მართლწესრიგის დამყარებისთვის მებრძოლ ადამიანს განაჩენი კანონიერმა ქურდებმა გამოუტანეს.
ბარნოვის თქმით, ქვეყნის პირველმა პირმა უკვე მოაწერა ხელი შინაგან საქმეთა და თავდაცვის ყოფილი მინისტრის შეწყალების აქტს და დოკუმენტი სასჯელაღსრულების სამინისტროს უახლოეს პერიოდში გადაეგზავნება.
"პროკურატურამ მთელი ერთწლიანი ყველანაირი მცდელობის მიუხედავად ვერ მოახერხა, რომ თუნდაც ერთი რომელიმე ბრალი გასაგებად დაედასტურებინა. მათ აქვთ მცდელობა, რომ კანონიერ ქურდებს მისცენ უფლება, რომ შური იძიონ და ციხეში ჩასვან ადამიანი, რომელიც მართლა ხმალამოღებული იბრძოდა ქვეყანაში წესრიგის, მართლწესრიგის და სტაბილურობის დასამკვიდრებლად. ეს იყო ძირითადი მოტივაცია, რის გამოც პრეზიდენტმა ხელი მოაწერა დღევანდელ შეწყალების აქტს ბაჩო ახალაიას მიმართ და ამის მიუხედავად, გვაქვს სამწუხარო რეალობა, რომ ისევდაისევ პროკურატურის მაქინაციების გამო ბაჩო ახალაია ახლა უკვე რაღაც ახალ აბსურდულ ბრალდებასთან დაკავშირებით რჩება წინასწარ პატიმრობაში და რამდენი ხანი გარძელდება ეს, ჩვენ სამწუხაროდ არ ვიცით. ასე რომ, ეს იყო მიზიეზი იმისა, რომ პრეზიდენტმა მიიღო გადაწყვეტილება და შეიწყალა ბაჩო ახალაია,"- განაცხადა ანდრო ბარნოვმა.