სად ვიყავით ჩვენ და ვინ ვიყავით ჩვენ, ამ შემთხვევაში "რესპუბლიკელები", შეგახსენებთ, 2 წლის წინ ჩვენს ყრილობაზე ჩვენ ვსაუბრობდით იმაზე, იატაკქვეშეთში ხომ არ გადასულიყო პარტია,- ამის შესახებ პარლამენტის თავმჯდომარემ საგამოფენო ცენტრ "ექსპო ჯორჯიაში" "რესპუბლიკური პარტიის" რიგით XV ყრილობაზე სიტყვით გამოსვლისას ისაუბრა.
დავით უსუფაშვილის განცხადებით, გასულ წელს, პარტიის ლიდერები მსჯელობდნენ იმაზე, რომ გადასარჩენი იყო ის იდეალები და ის ღირებულებები, რომლებსაც წლების განმავლობაში ემსახურებოდა "რესპუბლიკური პარტია".
"2011 წლის შემოდგომის მდგომარეობით, ვფიქრობდით ამ ღირებულებების გადარჩენაზე სადმე იატაკქვეშეთში. ჩვენ ძალიან კონკრეტული გეგმებიც გვქონდა ამის თაობაზე, თუ როგორ უნდა გაგვეკეთებინა ეს. დღევანდელი გადასახედიდან შესაზლოა, ვიღაცისთვის ეს დაუჯერებლად ჩანს და განსაკუთებით ჩვენი უცხოელი კოლეგებისთვის, რომლებიც ბუნებრივია, ბოლომდე ვერ ერკვეოდნენ ძალიან ბევრ საკითხში რა ხებოდა ამ ქვეყანაში და მათთვის ჩემი დღევანდელი სიტყვები შესაძლოა, ისეთივე შოკისმომგვრელია, როგორც ის სიტყვები, რასაც ჩვენ მაშინ ვეუბნებოდით ჩვენს მეგობრებს, რომ ძალიან ცუდად არის ქვეყანაში საქმე, ძალიან ცუდად მიდის ქვეყნის საქმე და მოდით, ერთად ვუშველოთ ამ ქვეყანას. იქედან დღემდე, როდესაც ჩვენ იატაკქვეშეთზე კი აღარ ვლაპარაკობთ, იმაზე ვლაპარაკობთ, თუ როგორ ვმართოთ უკეთ ქვეყანა. აი, რამხელა გზა გავიარეთ და რამდენი რამ მოხდა. დღეს "რესპუბლიკელები" პირველად ვატარებთ ჩვენს ყრილობას ამ როლში - სახელისუფლებო ტვირთით დატვირთულები, სახელისუფლებო პრობლემებით დატვირთულები ჩვენს კოლეგებთან ერთად. ეს არის მთავარი სიახლე დღევანდელი ჩვენი შეკრების და მთავარი გამოწვევა ჩვენი, როგორც პარტიის და პოლიტიკური ორგანიზაციის, პოლიტიკური გუნდის,"- განაცხადა დავით უსუფაშვილმა.
