თბილისის მერი გიგი უგულავა იმედოვნებს, რომ მინისტრთა კაბინეტის ხელმძღვანელად ირაკლი ღარიბაშვილის მუშაობის დროს, ცენტრალური მთავრობის მიდგომების ”მავნე პრაქტიკა” გადაიხედება.
როგორც უგულავას მიერ გავრცელებულ წერილშია ნათქვამი, იგი როგორც თბილისის მერი, მზადაა თბილისელების ინტერესების სასარგებლოდ, ცენტრალურ მთავრობასთან ითანამშრომლოს იმისათვის, რომ თბილისში ეკონომიკური კრიზისი დაძლულ იქნას და საბავშვო ბაღების, ტრანსპორტის, დასუფთავების, თბილისის კეთილმოწყობისა და უბრანული განვითარების სერვისები კიდევ უფრო მეტად განვითარდეს.
"ჩვენ ერთი წლის განმავლობაში ვაკვირდებოდით ცენტრალური მთავრობის მხრიდან თბილისისა და თბილისელების უგულებელყოფას და პოლიტიკურად მოტივირებულ გადაწყვეტილებებს, რომლებიც მხოლოდ თბილისის დასჯას ემსახურებოდა. ცენტრალურმა მთავრობამ გააჩერა პრაქტიკულად დასრულებული შემოვლითი რკინიგზა, ახალი ხიდის მშენებლობა და უამრავი მნიშვნელოვანი პროექტი, რომელიც აუცილებელია თბილისის განვითარებისთვის. ასევე, შეუმცირა თბილისს ბიუჯეტი, რითაც საფრთხის წინაშე დააყენა თბილისის ტრანსპორტის, საბავშვო ბაღების, დასუფთავების და სხვა მნიშვნელოვანი ინსტიტუტების ეფექტური მუშაობა. საფრთხის წინაშე დადგა, ასევე თბილისის საერთაშორისო ვალდებულება, ღირსეულად ჩაატაროს ახალგაზრდული ოლიმპიური ფესტივალი. მიუხედავად იმისა, რომ ახალი პრემიერ-მინისტრი არსებითად წინამორბედის საქმის გამგრძელებელია, ვიმედოვნებ, რომ ცენტრალური მთავრობის ზემოაღნიშნული მავნე პრაქტიკა გადაიხედება,"- აღნიშნულია უგულავას მიერ გავრცელებულ წერილში.
