ყირგიზეთის რესპუბლიკაში საქართველოს საგანგებო და სრულეფლებიანმა ელჩმა ზურაბ პატარაძემ რწმუნებათა სიგელები გადასცა ყირგიზეთის რესპუბლიკის პრეზიდენტს ალმაზბეკ ატამბაევს.
ცერემონიის მსვლელობისას, ალმაზბეკ ატამბაევმა მიულოცა ქართველ ხალხს ახალი პრეზიდენტის არჩევა და აღნიშნა, რომ მზად არის მასთან მჭიდრო და ურთიერთსასარგებლო თანამშრომლობისათვის. ამასთან, ყირგიზეთის სახელმწიფოს მეთაურმა მიულოცა ზურაბ პატარაძეს ყირგიზეთში დიპლომატიური მისიის ოფიციალურად დაწყება.
პრეზიდენტის განცხადებით, ყირგიზეთი დაინტერესებულია საქართველოსთან პოლიტიკური ურთიერთქმედების შემდგომი აქტივიზაციით და მრავალმხრივი, ტრადიციულად კონსტრუქციული კავშირების გაღრმავებით. ალმაზბეკ ატამბაევის სიტყვებით, პირველ რიგში ყურადღებას საჭიროებს ორ ქვეყანას შორის სავაჭრო-ეკონომიკური ურთიერთობებისა და საინვესტიციო სფეროში თანამშრომლობის გაძლიერება.
„იმედი მაქვს, რომ ჩვენი ქვეყნების ორმხრივი ურთიერთობები ხარისხობრივად ახალ დონეზე გადავლენ და მოგვეცემა საშუალება საფუძველი ჩაუყაროთ მსხვილ ერთობლივ ეკონომიკურ პროექტებს". - აღნიშნა ყირგიზეთის პრეზიდენტმა.
თავისი მისასალმებელი სიტყვის დასასრულს, ალმაზბეკ ატამბაევმა საქართველოს დიპლომატიური მისიის ხელმძღვანელს ყირგიზეთის რესპუბლიკაში საინტერესო და ნაყოფიერი მოღვაწეობა უსურვა. ამასთანავე, მან იმედი გამოთქვა, რომ ახლო მომავალში შედგება საქართველოს მაღალი რანგის დელეგაციის ვიზიტი ყირგიზეთში. „მერწმუნეთ, რომ ყირგიზული მხარე ფრიად მოხარული იქნება უმასპინძლოს ქართულ დელეგაციას" - დასძინა ალმაზბეკ ატამბაევმა.
