დღეს, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს სათათბირო საბჭოს მე-6 სხდომა გაიმართა. სხდომაზე, სამინისტროს რეგიონალური სამმართველოების ხელმძღვანელებმა ივლისი-ოქტომბრის პერიოდში განხორციელებული საქმიანობის და მომავალი თვის განმავლობაში გასატარებელი ღონისძიებების ანგარიში წარადგინეს.
დღევანდელი მონაცემებით, ზუგდიდის რეგიონში 104 დევნილ ოჯახს გადაეცა საცხოვრებელი ფართი, მიმდინარე წლის ბოლომდე კი 74 დევნილი ოჯახი მიიღებს ბინას. გარდა ამისა წლის ბოლომდე იგეგმება ფოთსა და ბათუმში 2 შენობის რეაბილიტაციის დასრულება.
იმერეთის რეგიონში 110 ბინა 249 დევნილისათვის განაწილდა. ამავე რეგიონში გადახურვის სამუშაოები, 300 დევნილი ოჯახისთვის, ხოლო ჩვილ ბავშვთა კომპაქტურ ჩასახლებაში გადახურვასთან ერთად, ფანჯრების შეცვლის სამუშაოები მიმდინარეობს. განვლილ პერიოდში 3 კლინიკასთან გაფორმდა მემორანდუმი, რომლებიც დევნილებს უფასო სამედიცინო გამოკვლევებს უტარებენ.
შიდა ქართლში, 56 დევნილი ოჯახი, მიმდინარე წლის ნოემბერში მიიღებს საცხოვრებელს. ქვემო ქართლში, 24 ოჯახი ნოემბრის პირველ ნახევარში განსახლდება. რუსთავში კი 22 დევნილ ოჯახს ბინები ნოემბერში გადაეცემა. ასევე, დევნილებს უფასო სამედიცინო გამოკვლევები თელავში ჩაუტარდათ.
თბილისში, ყვარლის ქუჩაზე 85 დევნილი ოჯახი ნოემბრის დასაწყისში შესახლდება.
სათათბირო საბჭომ ასევე, განსახლების პროცესის მიმდინარეობა, კომუნალური დავალიანების დაფარვა, ეკომიგრაციის პრობლემების გადაწყვეტის მიმდინარეობა და სხვა საკითხები განიხილა.
მასალის გამოყენების პირობები