5 ნოემბერს ეროვნული ბიბლიოთეკა გამომცემლობებთან ერთად ახლად გახსნილ "ლიბერთი ელექტრონულ დარბაზში" ახალ პროექტს იწყებს. პროექტის ფარგლებში ყოველ სამშაბათს და ხუთშაბათს გაიმართება შეხვედრები გამომცემლობების მიერ შერჩეულ თანამედროვე ქართველ ავტორებთან. "ლიბერთი ელექტრონული დარბაზის" პირველი სტუმარი იქნება მწერალი შორენა ლებანიძე, რომელიც გამომცემლობა "არტანუჯმა" წარადგინა.
5 ნოემბერს, 19:00 საათზე, საქართველოს პარლამენტის ეროვნული ბიბლიოთეკის "ლიბერთი ელექტრონულ დარბაზში" (გუდიაშვილის 7) შორენა ლებანიძესთან შეხვედრა გაიმართება. ლებანიძე აუდიტორიას წარუდგენს თავის მხატვრულ-დოკუმენტურ რომანს "ეს მე ვარ - ფიროსმანი". ღონისძიებაზე დასწრება თავისუფალია.
"რომანი დიდი ქართველი მხატვრის, ნიკო ფიროსმანის თავისებურ ლიტერატურულ ვერსიას გვთავაზობს. ოღონდ ჩემი, როგორც ავტორის, წარმოსახვა ხელოვნებათმცოდნეთაგან მოპოვებულ დოკუმენტურ მასალებს, საარქივო წყაროებსა და ფიროსმანის თანამედროვეთა მოგონებებში ამოკითხულ რეალურ ცნობებს ემყარება. რომანის ძირითადი არსია იდუმალებით მოცული დიდი ხელოვანის მარადიული ძიების პროცესის ასახვა, ძიებისა, რომელიც ფიროსმანის სიცოცხლეშივე დაიწყო და დღემდე გრძელდება", - აცხადებს წიგნის ავტორი.
