"მე დღეს მთელ საქართველოს მინდა მივულოცო, რომ საქართველოში ასეთი არჩევნები შედგა,"- ამის შესახებ კოალიცია ქართული ოცნების საპრეზიდენტო კანდიდატის გიორგი მარგველაშვილის საარჩევნო შტაბის ხელმძღვანელმა დავით საგანელიძემ დღეს ჩატარებული არჩევნების კომენტირებისას ისაუბრა.
საგანელიძემ კოალიცია "ქართული ოცნების" და გიორგი მარგველაშვილის საარჩევნო შტაბის სახელით საქართველოს მოსახლეობას მადლობა გადაუხადა და განაცხადა, რომ ქართველმა ხალხმა დღეს მთელ მსოფლიოს დაანახა, რომ ეს არის დემოკრატიული ქვეყანა.
"მინდა მადლობა გადავუხადო ქართველ ხალხს, საქართველოს მთელ მოსახლეობას თურმე შეგვძლებია ვიყოთ ისეთი დემოკრატები, ვიყოთ ისეთი ღირსეულები, როგორიც დღეს ჩვენ დავანახეთ მთელ მსოფლიოს ჩვენი თავი და ჩვენი სახე. საქართველოში ბოლოსდაბოლოს შედგა ისეთი არჩევნები, რომელზეც ალბათ ყველანი ვოცნებობდით ჩემი ჩათვლით. ჩვენ ყოველთვის ვოცნებობდით იმაზე, რომ ქვეყანაში ყოფილიყო ხალხის მიერ არჩეული პრეზიდენტი, არჩეული პარლამენტი, რომ ხალხს ემართა სახელმწიფო და ხელისუფლებას ჰქონოდა იმის განცდა, რომ ის ხალხის მიერ არის არჩეული. დღეს მე შემიძლია ამაყად ვთქვა, რომ საქართველოში ასეთი არჩევნები შედგა. მინდა მადლობა ვუთხრა ყველა იმ ადამიანს, ვინც დღეს მივიდა საარჩევნო ურნასთან, მიუხედავად იმისა, ვის მისცა ხმა. მინდა პირველ რიგში უღრმესი მადლობა გადავუხადო "ქართული ოცნების" საპრეზიდენტო კანდიდატის გიორგი მარგველაშვილის შტაბის მთელ შემადგენლობას იმ რაიონებში, იმ სოფლებში, იმ ოლქებში, იმ უბნებზე, სადაც ეს ადამიანები მართლაც დღეს კიდევ, ამ მომენტში სხედან და მუშაობენ იმისთვის, რომ ამ დოკუმენტს საბოლოო სახე მისცენ და იმას, რომ საქართველოს პრეზიდენტი იყოს ლეგიტიმურად არჩეული და ეს გაფორმდეს დოკუმენტის სახით,"- განაცხადა საგანელიძემ.
მმართველი კოალიციის საპრეზიდენტო კანდიდატის საარჩევნო შტაბის ხელმძღვანელმა ასევე მადლობა გადაუხადა ხმის მიცემის პროცესზე დამკვირვებელ ადგილობრივ თუ საერთშორისო ორგანიზაციებს, ასევე საქართველოს ცენტრალურ საარჩევნო კომისიას და მათი მუშაობის მნიშვნელობაზე ისაუბრა.
"მინდა ასევე უღრმესი მადლობა გადავუხადო ყველა ორგანიზაციას, სადამკვირვებლო მისიებს, რომლებიც საქართველოში ასე მრავლად იყვნენ ჩამობრძანებულები, რომლებმაც მართლა ძალიან დიდი შრომა გასწიეს ჩვენს არასამთავრობო ორგანიზაციებთან და სადმკვირვებლო მისიებთან ერთად და მართლა საქართველოს ყველა კუთხე-კუნჭული, თითქმის ყველა უბანი მოიარეს და ასეთი შეფასებები გააკეთეს. ამ შეფასებებს ჩვენ ალბათ კიდევ მოვისმენთ. მე მინდა ვთქვა ერთი რამ, რომ თურმე არ ყოფილა აუცილებელი, რომ ქართველ ხალხს ვინმემ უნდა ასწავლოს როგორ უნდა ჩატარდეს არჩევნები, რომ თურმე ქართველი ხალხი არ არის მომზადებული, თურმე ქართველ ხალხს არ აქვს გამოცდილება დემოკრატიული გზით სიარულისა, თურმე ამისთვის საჭირო ყოფილა პოლიტიკური ნება და რახან ეს პოლიტიკური ნება შარშანდელი არჩევნების შემდგომ გაჩნდა ქვეყანაში, სწორედ ამ პოლიტიკურმა ნებამ და მა ხელისუფლების ამ სურვილმა და ამ ბრძოლამ მიიღო ის შედეგი, რასაც დღეს ჩვენ ასე ვზეიმობთ საქართველოში წარმატებულად დამთავრებული არჩევნების სახით. მე ასევე დიდი პატივისცემით მიდა ყველა იმ კანდიდატს გამოვეხმაურო, ვინც მონაწილეობას ღებულობდა. მესმის ბევრის გულისწყრომა თუ ბევრის გულგატეხილობა, რომ მათ ვერ დაინახეს ის შედეგი, რასაც ალბათ ისინი ელოდნენ, მაგრამ მეორეს მხრივ, მე მინდა ვთქვა ერთი - ჩვენ ამ წუთში რა თქმა უნდა გვაქვს განცდა დიდი გამარჯვების, რა თქმა უნდა ყველას გულში დიდი სიხარული გვაქვს, ერთი სურვილი გვაქვს, ერთმანეთს გადავეხვიოთ და მივულოცოთ ის დიდი ემოცია, რომელიც თითოეული ჩვენთაგანის გულშია და მერწმუნეთ, ახლა ჩემს გულში მართლაც ძალიან დიდი სიხარული და დიდი ენერგიაა, მაგრამ მე პატივს ვცემ ყველა იმ სახელმწიფო სტრუქტურას, ვისაც ევალება თავისი საქმე აკეთოს და ამ შემთხვევაში ცენტრალურ საარჩევნო კომისიას. მიუხედავად იმისა, რომ ალბათ ყველა ეგზიტპოლი, რომელიც გამოქვეყნდა და ცალსახად ამბობს იმას, რომ არჩევნები პირველ ტურში დამთავრდა, რომ არჩევნებში გაიმარჯვა გიორგი მარგველაშვილმა, რომ ეს გამარჯვება იყო ღირსეული, ჯერ პროცესი დასრულებული არ არის,"- განაცხადა დავით საგანელიძემ.