,,გიორგი მარგველაშვილს ვუსურვებ გაამართლოს ხალხის ნდობა", _განაცხადა ,,ნაციონალური მოძრაობის" საპრეზიდენტო კანდიდატმა დავით ბაქარაძემ ეგზიტპოლების შედეგებს კომენტირებისას.
მისივე განმარტებით, არჩევნების შედეგები მთლიანობაში უკვე ნათელია და ცესკო-ს მონაცემები მნიშვნელოვან გარდატეხას არ მოახდენს.
"ეგზიტპოლის შედეგების მიხედვით უკვე გამოიკვეთა გარკვეული სურათი, რომელთან დაკავშირებითაც შეიძლება გაკეთდეს შეფასება. მიუხედავად იმისა, რომ ჩვენ ჯერ არ ვიცით საბოლოო შედეგი და ეს დადგინდება ცესკო-ს მიერ ხმების დათვლის შემდეგ, ჯამური სურათი ნათელია და არ ვთვლი, რომ მნიშვნელოვნად შეცვლის იმ გადანაწილებას, რომელიც ვიხილეთ. ქვეყნის და საქართველოს ინტერესებიდან გამომდინარე, მზად ვიქნებით ვაღიაროთ არჩევნების ის საბოლოო შედეგი, რომელიც დადასტურდება ცესკოს მიერ ხმების დათვლის შედეგად", _განაცხადა ბაქრაძემ, რომელმაც ხალხს არჩევნების მშვიდობიანად ჩატარება მიულოცა.
,,მინდა დღესვე მივულოცო ქართველ ხალხს არჩევნების მშვიდობიანად ჩატარება. ნათელია დღევანდელ საპრეზიდენტო არჩევნებში გამარჯვებული. ულოცავ გიორგი მარგველაშვილს გამარჯვებას, ულოცავ იმ ნდობას, რომელიც მიიღო ქართველი ხალხისგან და ვუსურვებ, გაემართლებინოს ეს ნდობა გაკეთებული საქმით", - განაცხადა ბაქრაძემ.
