,,ნაციონალური მოძრაობის" წევრის სერგო რატიანის განცხადებით ნაციონალური მოძრაობის" საპრეზიდენტო კანდიდატის შედეგი ადეკვატურია. როგორც ,,ჯი-ეიჩ-ენთან" საუბარში რატიანმა ეგზიტპოლების შედეგების კომენტირებისას განმარტა განვლილი ერთი წლის განმავლობაში, როცა ,,ნაციონალური მოძრაობის" წინააღმდეგ რეპრესიული მანქანა იყო ჩართული შედეგი ადეკვატურია.
,,მიუხედავად ყველაფრის მინდა მიულოცო გამარჯვება გიორგი მარგველაშვილს, რომელიც, ჯერჯერობით, ჩანს რომ გამარჯვებულია, თუმცა საბოლო შედეგი ჯერ არ გამოქვეყნებულა. გამოიკვეთა, რომ ხელისუფლებიდან წასვლის ერთი თვის თავზე ,,ნაციონალურ მოძრაობას" ჰყავს მყარი მხარდამჭერები, დაახლოებით, 20%. მინდა გითხრათ, რომ ეს არის დიდი გამარჯვება, რადგან ცალკე აღებულ რომელიმე პარტიას ამხელა მხარდაჭერა შეიძლება არ ჰქონდეს. განვლილი ერთი წლის განმავლობაში როცა ,,ნაციონალური მოძრაობის" წინააღმდეგ რეპრესიული მანქანა იყო ჩართული, როდესაც პარტიის გენერალური მდივანი დაკავებულია და ათასობით მხარდამჭერზეა აღძრული სისხლის სამართლის საქმე, ამ ფონზე მნიშვნელოვანია რომ საქართველოში ჩამოყალიბდა მყარი ელექტორატი, რომელსაც თავისი ღირებულებები აქვს. ამიტომ შედეგი ვფიქრობ, რომ ადეკვატურია", _განაცხადა ,,ჯი-ეიჩ-ენთან" საუბარში რატიანმა.
შეგახსენებთ, რომ უკრაინული კომპანია SOCIS-ის მიერ ჩატარებული ეგზიტპოლების მონაცემებით საპრეზიდენტო არჩევნებში კოალიცია ,,ქართული ოცნების" საპრეზიდენტო კანდიდატი გიორგი მარგველაშვილი 65% ლიდერობს. მეორე ადგილზეა ,ნაციონალური მოძრაობის" საპრეზიდენტო კანდიდატი დავით ბაქრაძე 16%, ,,დემოკრატიული მოძრაობის" საპრეზიდენტო კანდიდატს ნინო ბურჯანაძეს კი 9% აქვს.
კვლევა ახალი ამბების სააგენტო „ჯი-ეიჩ-ენისა" და გაზეთ „პრემიერის" დაკვეთით კომპანია SOCIS-მა ჩაატარა. კვლევა საქართველოს მასშტაბით 152 საარჩევნო უბანზე ჩატარდა. გამოიკითხა 12100 ამომრჩეველი.