„მე არ ვიცი ეგზიტპოლების შედეგები, არალოგიკურიც კი იქნებოდა, მე დიდი ხანია ვამტკიცებ, რომ საქართველოში სოციოლოგია არ მუშაობს,"- ამის შესახებ "დემოკრატიული მოძრაობის პრეზიდენტობის კანდიდატმა ნინო ბურჯანაძემ საგანგებოდ გამართულ ბრიფინგზე ეგზიტპოლების შედეგების კომენტირებისას ისაუბრა.
ბურჯანაძე მიიჩნევს, რომ ეგზიტპოლები და სხვადასხვა კვლევები არის საზოგადოებრივი აზრით მანიპულირების ძალიან კარგი საშუალება და შესაბამისად, მას არც აინტერესებს ეგზიტპოლებით დაფიქსირებული პროცენტული მაჩვენებლები.
"მე დაახლოებით ვიცი რა შედეგები იქნება პარალელური დათვლის შედეგად. ჩვენ ვაპირებთ ხმების დაცვას, ჩვენ დაწერილი გვაქვს ათასზე მეტი საჩივარი, ახლა არის ყველაზე რთული პერიოდი, როდესაც შეიძლება უბნებზე ბიულეტენების ჩაყრა მოხდეს, მაშინ, როდესაც კომისიებში არიან „ნაციონალური მოძრაობისა" და „ქართული ოცნების" წევრები, ჩვენ გვყავს მხოლოდ დამკვირვებლები და იმედი მაქვს, რომ ჩვენი დამკვირვებლები ძალიან ყურადღებით იქნებიან", - განაცხადა ნინო ბურჯანაძემ.