"ეგზიტპოლმა დაახლოებით ის შედეგი დასვა, რასაც ველოდებოდით და დარწმუნებული ვარ, რომ დიდად არც საბოლოო შედეგი იქნება განსხვავებული,"- ამის შესახებ საქართველოს სასჯელაღსრულების, პრობაციის და იურიდიული დახმარების საკითხთა მინისტრმა სოზარ სუბარმა ეგზიტპოლების შედეგების კომენტირებისას ისაუბრა.
მინისტრის თქმით, მმართველი გუნდის წევრები აბსოლუტურად დარწმუნებულნი იყვნენ, რომ საპრეზიდენტო არჩევნები პირველივე ტურში დამთავრდებოდა და დამატებითი ტურების გამართვა არ გახდებოდა საჭირო.
რაც შეეხება ამომრჩევლის დაბალ აქტივობას, სუბარის განცხადებით, ამ არჩევნებზე დაახლოებით ისეთივე აქტივობა იყო, როგორიც წინა წლებში, თუმცა შარშანდელი საპარლამენტო არჩევნების მსგავსი აქტივობა იმიტომ არ დაფიქსირდა, რომ გასული წლის ოქტომბერში საზოგადოების მოტივაცია რადიკალურად განსხვავებული იყო.
"უბრალოდ მინდა ვთქვა, აქტივობასთან დაკავშირებითაც. აქტივობა იყო საკმაოდ მაღალი. წინა წელს მართლაც გარდამტეხი არჩევნები იყო და ამიტომ მოვიდა ძალიან ბევრი ხალხი, სხვა დროს არჩევნებზე დაახლოებით ამდენივე ადამიანი მოდიოდა, უბრალოდ გაყალბების ხარჯზე ხდებოდა პროცენტის აწევა. დღეს არანაირი გაყალბება არ ყოფილა და დაფიქსირდა ის ციფრი, რომელიც მოვიდა. ეს არის ჩვეულებრივი ნორმალური აქტივობა ამომრჩევლის, უბრალოდ შარშანდელი წელი იყო გარდამტეხი წელი, როდესაც ქართველმა ხალხმა გადაწყვიტა, რომ "ნაციონალური მოძრაობა" და სააკაშვილი გაესტუმრებინათ საბოლოოდ და ამიტომ იყო ასეთი აქტიურობა. წელს უკვე იყო ჩვეულებრივი მშვიდი არჩევნები. ეს არ იყო ბრძოლის ველი, როგორც აქამდე ვიყავით დაჩვეული,"- განაცხადა სოზარ სუბარმა.
