სააკაშვილის თქმით, ამ შემთხვევაში, როცა მთავრობა უკვე წინა საპარლამენტო არჩევნების შედეგად არის კონკრეტული ძალის ხელში, ახლა არჩევანი შეიძლება გავაკეთოთ მხოლოდ ზარალის მინიმიზაციისთვის.

ქვეყნის პირველი პირი მიიჩნევს, რომ მთავარი, ძირითადი პროექტები საქართველოში შეჩერებულია, ქვეყანა დაპაუზებულ მდგომარეობაშია და ესეც ყველაფერი კარგად ვიცით, თუმცა გარდა ამისა, კიდევ ბევრი სხვა ტენდენცია შეიმჩნევა, რომელიც ნამდვილად არ არის კარგი ხალხისთვის.

"ახლა საჭიროა ამ ყველაფრის მინიმიზაცია და საფუძვლის მომხადება შემდგომი შემობრუნებისთვის. საპრეზიდენტო არჩევნები საქართველოში რა თქმა უნდა, ბოლომდე ყველაფერს არ წყვეტს, იმიტომ, რომ პრეზიდენტის ახალი ფუნქციები აღარ მოიცავს აღმასრულებელი ხელისუფლების ხელმძღვანელობას. ეს ნიშნავს იმას,რომ პრაქტიკულად ყოველდღიურ ცხოვრებაზე საქართველოს პრეზიდენტის ინსტიტუტი გავლენას ვეღარ მოახდენს ახალი კონსტიტუციით,"- განაცხადა მიხეილ სააკაშვილმა და დასძინა, რომ მეორეს მხრივ, პარლამენტის ხელშია მთავრობა და არჩევნების შედეგებსაც აქვს ამ მხრივ მნიშვნელობა.

"მოხდება სერიოზული გადაჯგუფებები საქართველოში. შემდეგი მთავრობები მე ვფიქრობ, ჩქარა შეიცვლებიან. იფუნქციონირებენ იმ პირობებში, როდესაც ისინი იქნებიან ყოველდღიური საპარლამენტო კონტროლის ქვეშ და ამ მხრივ ეს არის ახალი სკოლა დემოკრატიის, როცა ხალხი თუ კარგად გააკონტოლებს პარლამენტს, ყოველდღიურად ექნება ბერკეტი, რომ შეახსენოს, რომ ხალხზე უნდა იფიქროს და იზრუნოს. მე ასე მგონია, რომ ახალი მოდელი ამ მხრივ არის სწორი,"- აღნიშნა სააკაშვილმა.

მიხეილ სააკაშვილი ახალი პრეზიდენტის ფუნქციების საკითხსაც გამოეხმაურა და განაცხადა, რომ შეცვლილი კონსტიტუციით, პრეზიდენტის ფუნქციები არის სერიოზული, მაგრამ ძირითადი ნაწილი მაინც სიმბოლურია, საქართველოსთვის სიმბოლიკასაც აქვს მნიშვნელობა.

"ამიტომ, სულ ერთი ნამდვილად არ არის როგორ დამთავრდება ეს საპრეზიდენტო არჩევნები და პრეზიდენტს საერთაშორისო თვალსაზრისითაც შეუძლია სერიოზული განსხვავების მოცემა, გააჩნია ვინ იქნება ეს პრეზიდენტი,"- დასძინა პრეზიდენტმა.