"როგორც არ უნდა დამთავრებულიყო შარშანდელი საპარლამენტო არჩევნები, მე ვაპირებდი პოლიტიკისგან დასვენებას,"- ამის შესახებ საქაღთველოს პრეზიდენტმა მიხეილ სააკაშვილმა საკუთარ სახლში, ჟურნალისტებთან საუბრისას განაცხადა.
სააკაშვილის თქმით, მისი ამ გადაწყვეტილების შესახებ მისმა თანაგუნდელებმა და საერთაშორისო პარტნიორებმა კარგად იცოდნენ, თუმცა ახლა, როდესაც საქართველო დიდი გაურკვევლობის ეპოქაში შედის, მისთვის გაცილებით მნიშვნელოვანია ქვეყნის ბედი, ვიდრე პირადი მდგომარეობა.
"მე დღეს ჩემი დილა დავიწყე იმითი, რომ გავირბინე ანაკლიის ბულვარზე და ვემზადები იმ პერიოდისთვის, რომ თუნდაც რაღაც პერიოდი იყოს, როცა შემეძლება ცოტა დავისვენო ალბათ და ძალები მოვიკრიბო. მართალი გითხრათ, არ ვარ დაღლილი, მაგრამ ემოციურად გადატვირთული რა თქმა უნდა ვარ. გარკვეულ პერიოდებში ყველა პოლიტიკოსს აქვს თავისი მარაგი. ყველა შემთხვევაში, როგორც არ უნდა დამთავრებულიყო შარშანდელი საპარლამენტო არჩევნები, მე ვაპირებდი პოლიტიკიდან ერთი პერიოდი დასვენებას. მით უმეტეს თუ ისე დამთავრდებოდა, რომ აღმშენებლობა გაგრძელდებოდა, საერთოდ ვაპირებდი დასვენებას და პოლიტიკიდან ჩამოშორებას, უნდა ვთქვა და ეს იყო ჩემი მტკიცე გადაწყვეტილება და ამის შესახებ ჩემმა თანამებრძოლებმა და ჩვენმა საერთაშორისო პარტნიორებმა კარგად იცოდნენ. ახლა საქართველო შედის გაურკვევლობის რთულ ეპოქაში და ჩემთვის უფრო მნიშვნელოვანია, რომ საქართველო გაერკვეს, ვიდრე მე როგორ გამოვერკვევი და მე რას გავაკეთებ ჩემთვის,"- განაცხადა მიხეილ სააკაშვილმა.
