საქართველოს ცენტრალური საარჩევნო კომისიის ინფორმაციით, ქვეყნის მასშტაბით ხმის მიცემის პროცესი მშვიდ ვითარებაში, განსაკუთრებული ექსცესების გარეშე მიმდინარეობს, თუმცა რამდენიმე უბანზე რიგი უმნიშვნელო დარღვევები დაფიქსირდა.
ცესკო-ს პრეს-სპიკერის ეკა აზარაშვილის განცხადებით, კრწანისის ერთ-ერთ უბანზე 3-მა პირმა პირადობის დამადასტურებელი დოკუმენტი უფლებამოსილი პირის ხელმოწერის გარეშე წარადგინა, რის გამოც, საუბნო საარჩევნო კომისიამ მათ არჩევნებში მონაწილეობის უფლება არ მისცა.
ასევე, ცესკო-ს იფორმაციით, შელაპარაკება მოხდა ახალციხის 35-ე უბანთან, თუმცა უშუალოდ საარჩევნო უბნის შიგნით რაიმე დაძაბულობას ადგილი არ ჰქონია.
საარჩევნო ადმინისტრაციაში ასევე აცხადებენ, რომ საბურთალოს 63-ე უბანზე ლუქებთან დაკავშირებით იყო გაურკვევლობა, თუმცა ინციდენტი ამოწურულია.
12:00 საათის მონაცემებით, საპრეზიდენტო არჩევნებში მონაწილეობა ამომრჩეველთა საერთო რაოდენობის 17.15%-მა მიიღო, რაც 606 710 მოქალაქეს შეადგენს.
საარჩევნო უბნებზე ამომრჩეველთა მისვლის ინტენსივობით თბილისი, რაჭა-ლეჩხუმის და გურიის რეგიონები გამოირჩევიან.
