"ოლიმპიადა არის მშვიდობის, ხალხის თანაცხოვრების და ერთად განვითარების სიმბოლო და ჩვენ არ შეიძლება მივიღოთ მონაწილეობა იქ, სადაც ოკუპანტი მთელს მსოფლიოს თვალში ნაცარს აყრის,"- ამის შესახებ საქართველო სპრეზიდენტის ადმინისტრაციის ხელმძღვანელმა ანდრო ბარნოვმა დღეს გავრცელებული იმ ინფორმაციის კომენტირებისას ისაუბრა, რომლის თანახმად, სოჭის ოლიმპიადის ერთ-ერთი პირველი მეჩირაღდნე 2008 წლის რუსეთ-საქართველოს ომში მონაწილე სამხედრო მფრინავი ივან ნაჩაევი იქნება.
"ჩვენი საზოგადოება არ ეთანხმება ამას და თუ ჩვენი პრემიერი ეთანხმება ამას და ტუ ჩვენი მმართველი პარტიის საპრეზიდენტო კანდიდატი ეთანხმება, მათ შეუძლიათ კერძოდ წავიდნენ და ისე მიიღონ იქ მონაწილეობა და მერე ჩვენ შევაფასებთ მათ ქმედებას სათანადოდ,"- განაცხადა ანდრო ბარნოვმა.
აღნიშნულ საკითხს რეინტეგრაციის საკითხებში სახელმწიფო მინისტრი პაატა ზაქარეიშბილიც გამოეხმაურა. მისი შეფასებით, "თუ დავიწყებთ ჩხირკედელაობას ვის ეჭირება ჩირაღდანი ხელში და ამის გამო ჩვენი პოზიციების გადახედვას დავიწყებთ, არასწორი იქნება".
"მიუხედავად ყველაფრისა, რაც მოხდა, რეგიონული უსაფრთხოებიდან გამომდინარე, საერთაშორისო ჩართულობიდან გამომდინარე და საქართველოს პრესტიჟიდან გამომდინარე, უნდა მივიღოთ მონაწილეობა ოლიმპიადაში. რუსეთმა უდიდესი ზარალი მიაყენა ქვეყანას, ოკუპაცია განახორციელა და აფხაზეთის და სამხრეთ ოსეთის აღიარება მოახდინა, მაგრამ მიუხედავად ამისა, ჩვენ ოლიმპიადაში ვმონაწილეობთ,"- განაცხადა პაატა ზაქარეიშვილმა.
რუსი სამხედრო მფრინავი ივან ნაჩაევი 2008 წლის აგვისტოში საქართველოში "სუ 25"-ის ტიპის თვითმფრინავით საბრძოლო დავალებებს ასრულებდა. აღნიშნული ომის შემდეგ მას რუსეთში გმირის წოდებაც მიენიჭა.