ქვეყანაში არსებულ ეკონომიკურ მდგომარეობაზე საუბარს პარლამენტში დღეს უმრავლესობა და უმცირესობა აპირებს. დებატებისტთვის ორივე მხარე საგანგებოდ მოემზადა. კოალიციის თქმით მოძიებულია და მთავრობისგან გამოთხოვილია ყველა საჭირო მონაცემი.
ჯერ ჯერობით უცნობია დაესწრება თუ არა მთავრობა საპარლამენტო დებატებს. შეხვედრა პარლამენტში უმცირესობის თხოვნით დაინიშნა.
დეპუტატები იმედოვნებენ, რომ დებატები პოლიტიკური კინკლაობის ფორმატში არ წარიმართება.
„დებატები გაიმართება რეგლამენტით დადგენილი პროცედურების მიხედვით. ექნება აბსოლუტურად თანაბრად შესაძლებლობა და დრო როგორც უმცირესობას ასევე უმრავლესობას და მე დარწმუნებული ვარ, რომ კიდევ ერთხელ დავარწმუნებთ საზოგადოებას, თუკი რაიმე კითხვის ნიშნებია, რომ არანაირი პრობლემა ქვეყანას ეკონომიკური განვითარების თვალსაზრისით არა აქვს და ყველაფერი მიდის იმ პროგრამის და იმ გეგმის მიხედვით რომელიც მთავრობას აქვს", _ განაცხადა საქართველოს პარლამენტის თავმჯდომარის პირველმა მოადგილე, ფრაქცია"ქართული ოცნების" წევრმა მანანა კობახიძემ.
