"საერთო ეროვნული დიდი კრიზისის წინაშე ვართ და ამ კრიზისის დროს მთავარი საქართველოს ერთიანობაა და მათ შორის, მიუხედავად იმისა, მოგვწონს ერთმანეთი თუ - არა,"- ამის შესახებ საქართველოს პრეზიდენტმა მიხეილ სააკაშვილმა ოკუპიებული ცხინვალის რეგიონის მიმდებარე სოფლებში ბოლო დღეებში განვითარებული მოვლენების კომენტირებისას ისაუბრა.
ქვეყნის პირველი პირის თქმით, "ბოლო თვეებში საქართველომ დაკარგა უფრო მეტი სახნავ-სათესი მიწა, ვიდრე საიკარგა ქურთაში და თამარაშენში ერთად აღებული 2008 წლამდე".
ამასთან, სააკაშვილი მიიჩნევს, რომ "ქურთას და თამარაშენის აღება რუსეთს ძალიან დიდი პოლიტიკური ფასის სანაცვლოდ მოუხდა, ახლა კი, მას პოლიტიკურად საერთოდ არაფერი გადაუხდია, რადგან ყველაფერი ძალიან ჩუმად მოხდა".
"ამის შესახებ ახლა დავიწყეთ პატარ-პატარა ლაპარაკები თორემ არავინ არაფერი იცის ამის შესახებ. საერთოდ, პრაქტიკულად მშრალი გამოვიდა რუსეთი ამ წყლიდან. თუ მას არაფერი არ დაუჯდება ეს, ის ამას გააგრძელებს. ამიტომ, ეს გამოცდილება ჩვენ გვაქვს დაგროვილი - მიღწევებისაც და შეცდომებისაც. მე არ გავურბივარ არც შეცდომებს და ჩვენ ვიცით რა მიღწევები გვაქვს. ამიტომ, სწორედ ეს გვინდა გავუზიაროთ - არა მხოლოდ ჩვენი მიღწევების შესახებ, არამედ განსაკუთრებით იმ შეცდომების შესახებ, რომლებიც რა თქმა უნდა იყო. რაღაცეები უკეთესად შეიძლებოდა გაკეთებულიყო, მაგრამ ახლა კონფრონტაცია არ გვარგებს, იმიტომ, რომ ჩვენი მიწა მიაქვთ, ჩვენს ხალხს ასახლებენ და რამდენიც არ უნდა ვიძახოთ, რომ ეს არის პროვოკაცია, რომელიც მიმართულია ჩვენი დაახლოების წინააღმდეგ, თავიდან ლამის იყო მცდელობა, რომ ჩვენზე გადმოებრალებინათ, ეს არ გამოვა. ეს არის ფაქტი. ვინც არ უნდა იყოს საქართველოს მთავრობის სათავეში - შევარდნაძე, გამსახურდია, სააკაშვილი თუ ივანიშვილი, რუსეთი აგრძელებს ერთიდაიგივეს. ერთმანეთს ნიშნები არ უნდა მოვუგოთ და ამას დიდი ხანია, ყველანი უნდა მივხვდეთ,"- განაცხადა მიხეილ სააკაშვილმა.