"მყარად უნდა მოვათავსოთ ჩვენი გემი ამ შტორმის დროს, როცა მეკობრეები მოგვდევენ ევროპულ წყლებში,"- ამის შესახებ საქართველოს პრეზიდნტმა მიხეილ სააკაშვილმა ქვეყნის ევროატლანტიკური მისწრაფებების მნიშვნელობის საკითხის კომენტირებისას ისაუბრა.
სააკაშვილის თქმით, "ახლა რუსეთი არის შეტევაზე მთელი ევროპის მიმართულებით - მოლდოვის, უკრაინის, სომხეთის შემთხვევაში და სომხეთი პრინციპში, კუთხეში მოამწყვდია და ჩამოაშორა ევროპულ გზას".
"საქართველოდან რაღაც ნოტები გაისმა ევრაზიულ კავშირზე, რაც სრულიად მიუღებელია. ამიტომ, ახლა არის ძალიან გადამწყვეტი მომენტი, რომ საქართველო როგორმე შევათრიოთ ევროპაში, შევიყვანოთ ევროკავშირთან იურიდიულ ზონაში, ბევრად უფრო მყარად მოვათავსოთ ჩვენი გემი ამ შტორმის დროს, როცა მეკობრეები მოგვდევენ ევროპულ წყლებში. ამიტომ იყო გაეროზე ამხელა რეზონანსი მათ შორის ევროპულ ბევრ ქვეყანაში. იმიტომ, რომ ითქვა ის, რასაც გულში ყველა ფიქრობდა. ვიღაცას უნდა ეთქვა და მე ვფიქრობ, მათი ქმედებები არის პასუხი 2008 წლის ომზე ევროკავშირის პარტნიორობის. მე მაშინ ევროკავშირის ერთ-ერთმა ხელმძღვანელმა მითხრა, რომ ჩვენ შევქმენით პარტნიორობა, იმიტომ, რომ ჩვნს ინტერესებშია საქარტველოს გადარჩენა. იმიტომ, რომ საქართველო თუ გადარჩება, რუსეთი წააგებს და ჩვენ გვინდა, რომ პუტინმა წააგოსო. ეს პოლიტიკა მე ვფიქრობ, სულ უფრო გამოხატულია არა მხოლოდ ერთი ცალკე აღებული რომელიღთაც ხელმძღვანელის დონეზე, არამედ უკვე პრაქტიკულად ყველა დონეზე ევროკავშირში. ყველაზე უფრო სკეპტიკურ ქვეყნებშიც კი,"- განაცხადა მიხეილ სააკაშვილმა.