"მზად ვარ ივანიშვილი ჩავიყვანო ანაკლიაში და ვაჩვენებ, რომ ანაკლია და ლაზიკა ერთიდაიგივე გეოგრაფიული დასახელებაა,"- ამის შესახებ საქართველოს პრეზიდენტმა მიხეილ სააკაშვილმა პრემიერ-მინისტრ ბიძინა ივანიშვილის იმ განცხადების კომენტირებისას ისაუბრა, რომლის თანახმად, თანაინვესტირების ფონდიდან შესაძლოა ანაკლიის პორტის მშენებლობა დაფინანსდეს, ხოლო რაც შეეხება პორტ ლაზიკას, აღნიშნული პროექტის განხორციელება არ იგეგმება.
"ლაზიკა - როგორც გეოგრაფიული სახელი, არ არსებობს. არსებობს ანაკლია და ანაკლიის შუაგულში ლაზიკის პორტი გორგორც იდეა, როგორც პროექტი. კარგი იქნებოდა, რომ მთავრობას მიეწოდებოდეს ინფორმაცია, კარგი იქნებოდა, რომ მთავრობა და მისი თავმჯდომარე დადიოდნენ და საკუთარი თვალით ხედავდნენ რაღაცეებს. მე მზად ვარ, რომ პრემიერ-მინისტრ ივანიშვილთან ერთად თბილისის აეროპორტის ასაფრენი ზოლიდან, რომლის მშენებლობაც მან შეაჩერა, იმ ფრანგული ვერტმფრენებით ავფრინდე, რომლის გაყიდვაც და საქართველოდან მოშორებაც მას სურს. დასაწყისისთვის გადავუფრინოთ თბილისის შემოვლით რკინიგზას, რომელიც მისი განკარგულებით შეჩერდა და დაინახოს ზემოდან რა მასშტაბის სამუშაოებია გაკეთებული, იმიტომ, რომ ამის წყალში გადაყრა არ შეიძლება. შემდეგ გადავუფრინოთ ქუთაისს და ვაჩვენოთ პარლამენტის მნიშვნელობა, რომ არ გადმოიტანოს ის თბილისში. გადავუფრინოთ წყალტუბოს, რა პროექტს ვაკეთებდით და პრაქტიკულად, 80% შეჩერებულა, გადავუფრინოთ თეთნულდის დიდ კურორტს მესტიაში და იმ ადგილს, სადაც გვირაბი უნდა გაკეთებულიყო, რომელიც სვანეთისთვის და საქართველოსთვის ისტორიული შანსი იყო და შემოვუფრინოთ ბათუმის ტექნოლოგიურ უნივერსიტეტს, რომელიც მისი განკარგულებით შეჩერდა, რომელიც პრაქტიკულად დამთავრებულია. შემდეგ მზად ვარ, რომ ჩავიყვანო ანაკლიაში, გადავუფრინოთ ანაკლიას, დავჯდეთ და ადგილზე ვაჩვენებ, რომ ანაკლია და ლაზიკა ერთიდაიგივე გეოგრაფიული დასახელებაა. ამას სიამოვნებით გავაკეთებ თუ ბატონი პრემიერი დათანხმდება, რომ კაბინეტიდან თუ სახლიდან გამოვიდეს და ერთხელ მაინც მოიაროს ყველა ეს გაჩერებული მშენებლობა, ცალი თვალი მაინც შეავლოს და იქნებ გული აუჩუყდეს და თავის ამ გადაწყვეტლებას - შეჩერების შესახებ გადახედოს, იმიტომ, რომ დაინახავს რომ ამას აქვს უზარმაზარი მნიშვნელობა საქართველოსთვის და დიდი მავნებლობაა რაც ამ პროექტების გაჩერებას მოჰყვა,"- განაცხადა მიხეილ სააკაშვილმა.
ცნობისთვის, დღეს დაარსებული თანაინვესტირების ფონდიდან შესაძლოა, ანაკლიის პორტის მშენებლობა დაფინანსდეს. აღნიშნულის შესახებ განცხადება, პრემიერმა-მინისტრმა ბიძინა ივანიშვილმა გააკეთა და განმარტა, რომ საქართველო არის სატრანზიტო ქვეყანა და ასეთი პორტის მშენებლობით ქვეყნის ტვირტგამტარიანობა კიდევ უფრო გაიზრდება. ივანიშვილის განმარტებით, თავდაპირველად იხილებოდა სამი პროექტი და საბოლოოდ არჩევანი ანაკლიის პორტზე შეჩერდა.
"თანაინვესტირების ფონდის არსებობა ქვეყანას უკვე აძლევს დიდ რეკლამას და ინვესტორებს აქვთ შესაძლებლობა, სხვადასხვა პროექტებში ჩადონ ფული. ფონდს შესაძლებლობა აქვს არა მხოლოდ თანაინვესტირების, არამედ შესაძლებელია ამ ფონდიდან პირდაპირი ინვესტიციების განხორციელება. საუბარია საშუალო და დიდი პროექტებზე, მაგრამ თუ ინვესტორს ექნება სურვილი საკუთარ პორტში შეიყვანოს თანაინვესტირების ფონდი, მან უნდა მიმართოს ფონდს. საქართველო გახლავთ სატრანზიტო ქვეყანა და ჩვენ განვიხილავთ ანაკლიაში წელიწადში 110 მლნ ტონა ტვირთის გამტარუნარიანობის პორტის მშნებელობას. რომელიც იმუშავებს 12 თვის განმავლობაში. წინა ხელისუფლება კი საუბრობდა ამ პორტის მშენებლობაზე, მაგრამ მათ არც პროექტი ჰქონდათ და არც დასაფინანსებელი თანხა. ვიდრე ანაკლიის პორტს მივანიჭებდით უპიტრატესობას, სამი პროექტი განვიხილეთ, მინდა გითხრათ რომ ლაზიკის პორტი აგებდა ანაკლიის პორტთან. ახლა ვმუშაობთ კონსორციუმის შექმნასა და დაფინანსებაზე", - განაცხადა ბიძინა ივანიშვილმა.