დღეს, პოლონეთში, ქ. ვარშავაში, საერთაშორისო ორგანიზაცია „ევროგეოგრაფიკის" გენერალური ასამბლეა გაიხსნა, რომელსაც 50 ქვეყნის 140 წარმომადგენელი ესწრება.
საქართველოდან ასამბლეას, იუსტიციის სამინისტროს საჯარო რეესტრის ეროვნული სააგენტოს თავმჯდომარე ეკატერინე კერესელიძე და საერთაშორისო ურთიერთობების სამსახურის უფროსი ეკატერინე მესხიძე ესწრებიან.
ასამბლეაზე განხილული იქნება „ევროგეოგრაფიკის" მიმდინარე წლის ანგარიში, კადასტრისა და მიწის რეგისტრაციის სამომავლო ტენდენციები, უძრავი ქონების ბაზრის განვითარებასთან დაკავშირებული სტრატეგიული მნიშვნელობის საკითხები და სხვ. მრგვალი მაგიდის ფორმატში გაიმართება დისკუსიები ,,ევროკავშირის ქვეყნებში გეოგრაფიული სივრცითი ინფორმაციის ინფრასტრუქტურის ჩამოყალიბების შესახებ".
საერთაშორისო ორგანიზაცია ,,ევროგეოგრაფიკი" 2001 წელს, 99-წლიანი ვადით შეიქმნა და ევროპის ტოპოგრაფიის, საკადასტრო და მიწის რეგისტრაციის ორგანიზაციების ასოციაციას წარმოადგენს. დღეის მდგომარეობით, „ევროგეოგრაფიკის" წევრია 45 ქვეყანა, მათ შორის საქართველო, რომელიც ორგანიზაციის სრული წევრი 2010 წელს გახდა. სწორედ ამ დროიდან დაიწყო მუშაობა საქართველოს ტერიტორიულ-სივრცული მონაცემების (გეოგრაფიული, ტოპოგრაფიული, საკადასტრო და მიწასთან დაკავშირებული სხვა ინფორმაცია) ევროპის ერთიან ინტერნეტ რუკაზე განსათავსებლად.
ასამბლეა 3 ოქტომბერს დასრულდება.