საქართველოს სახალხო დამცველმა მოქალაქე დიანა ეგანიანის მიმართ არსებულ სისხლის სამართლის საქმეში სამართალდამცავი პირების მიერ განხორციელებულ კანონდარღვევებთან დაკავშირებით წინადადებით მიმართა საქართველოს შინაგან საქმეთა მინისტრს ირაკლი ღარიბაშვილს.
საქართველოს სახალხო დამცველის აპარატმა განიხილა განმცხადებელ დიანა ეგანიანის მიერ წარმოდგენილი დოკუმენტები, მათ შორის დაკითხვის ოქმები, რომელთა საფუძველზეც დიანა ეგანიანი და მისი მეუღლე ვლადიმერ საჰაკიანი დამნაშავედ იქნენ ცნობილნი.
ოქმების თანახმად, დიანა ეგანიანის დაკითხვა მიმდინარეობდა 2012 წლის 5 დეკემბერს, 17:20 საათიდან 20:55 საათამდე. მისი მეუღლის დაკითხვა კი 19:20 საათიდან 20:05 საათამდე. ასევე, საჰაკიანის ფაქტობრივი დაკავების ზუსტ დროდ მითითებულია 19:20 საათი; პირადი ჩხრეკა მიმდინარეობადა 19:25 საათიდან 19:38 საათამდე.
როგორც ოქმებიდან ირკვევა, ვლადიმერ საჰაკიანის დაკავება და პირადი ჩხრეკა, დიანა ეგანიანის დაკითხვის პარალელურად ჩატარდა. მიუხედავად ამისა, ოქმებში მითითებულია, რომ საგამოძიებო მოქმედებაში მონაწილეობას იღებდა ერთი თარჯიმანი - ნანული გოგოლაძე.
მოქმედი სისხლის სამართლის საპროცესო კოდექსის თანახმად, მოწმეს უფლება აქვს ჩვენება მისცეს მშობლიურ ენაზე, თუ მან არ იცის სისხლის სამართლის პროცესის ენა და ისარგებლოს თარჯიმნის უფასო მომსახურებით. ამასთან, „თუ დაკითხვაში მონაწილეობს თარჯიმანი, იგი ზეპირად უთარგმნის დასაკითხს მისი ჩვენების ჩანაწერს, ხოლო წერილობით - მისი ხელით დაწერილ ჩვენებას. თარჯიმანი ხელს აწერს ჩვენების ჩანაწერს ოქმის ბოლოს და მის თითოეულ გვერდს ცალ-ცალკე, აგრეთვე დასაკითხის ხელით დაწერილი ჩვენების თარგმანს."
სისხლის სამართლის პროცესის წარმოებაში კვალიფიციური თარჯიმნის მონაწილეობას სავალდებულოდ და სამართლიანი სასამართლოს უფლების ერთ-ერთ არსებით შემადგენელ პრინციპად მიიჩნევს ევროპული სასამართლოც.
ყოველივე ზემოაღნიშნულიდან გამომდინარე, ნათელია, რომ მიუხედავად იმისა, რომ კანონმდებლობა ცალსახად მოითხოვდა როგორც ვლადიმერ საჰაკიანის დაკავებისა და პირადი ჩხრეკის დროს, ისე დიანა ეგანიანის მოწმის სტატუსით დაკითხვის ეტაპზე თარჯიმნის მონაწილეობას, თბილისის შსს მთავარი სამმართველოს უბნის ინსპექტორების სამმართველოს მე-3 განყოფილების უბნის უფროსი ინსპექტორ-გამომძიებლებმა - მანუჩარ მარგიანმა, რევაზ ავდაიანმა და ოთარ დგვარელმა არ შეასრულეს კანონმდებლის მოთხოვნა. ვინაიდან, ერთდროულად მიმდინარე საგამოძიებო მოქმედებებში ერთი და იგივე თარჯიმანი ფიზიკურად ვერ მიიღებდა მონაწილეობას. შესაბამისად, არსებობს იმის გონივრული ვარაუდი, რომ თარჯიმანი საგამოძიებო მოქმედებებს არ ესწრებოდა სრულად და მოგვიანებით ახორციელებდა ოქმების თარგმნას და ხელმოწერით დადასტურებას. შესაბამისად, გამომძიებლებმა არ შეასრულეს მათზე კანონით დაკისრებული ვალდებულება და არ უზრუნველყვეს თარჯიმნის მონაწილეობა შესაბამის საგამოძიებო მოქმედებებში.
ყოველივე ზემოაღნიშნულიდან გამომდინარე, „საქართველოს სახალხო დამცველის შესახებ" საქართველოს ორგანული კანონის 21-ე მუხლის „დ" ქვეპუნქტის შესაბამისად, სახალხო დამცველმა წინადადებით მიმართა შს მინისტრს, დაიწყოს დისციპლინური სამართალწარმოება გამომძიებლების წინააღმდეგ და განახორციელოს კანონშესაბამისი რეაგირება.